Bakı Ali Neft Məktəbinin 11 tələbəsi xaricdə ixtisasartırma kurslarında iştirak edəcək

Bakı Ali Neft Məktəbinin (BANM) 11 tələbəsi Norveç, Fransa və İtaliyada 2 ay ərzində
ixtisasartırma kurslarında iştirak edəcək.

Milli.Az bildirir ki, onlar Heydər Əliyev Fondu və İtaliyanın neft və qaz şirkəti - "Technip FMC" arasında
imzalanmış əməkdaşlıq memorandumu çərçivəsində həyata keçirilən "Neft, qaz və neft-kimya
sahəsində təhsil alan tələbələr üçün texnoloji biliklərin ötürülməsi üzrə magistr proqramı"
layihəsinin qalibləridirlər.

Layihə çərçivəsində qalib seçilən 11 nəfərdən 6-sı - Cavid Məmmədli, Fidan Quliyeva, Cavid
Məcidov, Nigar Cahangirova, Faiq Hacıbalayev, Arzu Abdullayeva Kimya mühəndisliyi ixtisasının
V kurs tələbələri, qalan 5 nəfər isə - Əli Nuraliyev, Aytac Xodayeva, Mirzəxan Əliyev, Xalidə
Əhmədzadə, Elgün Yusifov Neft-qaz mühəndisliyi ixtisasının V kurs tələbələridirlər.
Bakı Ali Neft Məktəbinin rektoru Elmar Qasımov xaricdə ixtisasartırma kurslarında iştirak
edəcək tələbələr və onların valideynləri ilə görüşüb. Tələbələri təbrik edən rektor bildirib ki, gərgin
və rəqabətli əmək bazarında peşəkar mütəxəssis kimi yetişmək üçün diplom yetərli deyil. O qeyd
edib ki, ixtisasla bağlı biliklərlə yanaşı, praktiki bacarıqlar, xarici dil bilgiləri, yaradıcı yanaşma,
sosial bacarıqlar, idarəetmə bacarıqları, məsuliyyətli yanaşma, nizam-intizam, qlobal trendləri
izləmək, yenilikləri tətbiq etmək və onlara adoptasiya olmaq da çox önəmlidir. Rektor onu da əlavə
edib ki, tələbələrin şəxsi inkişafında xüsusi izlər qoyacaq bu kurs onların əcnəbi həmkarları ilə yeni
əlaqələr qurması baxımdan da perspektivlidir.

E.Qasımov ixtisasartırma kurslarında iştirak edəcək tələbələrə təcrübə keçəcəkləri ölkələrdə
Ali Məktəbi, eləcə də Azərbaycanı layiqincə təmsil etməyi tövsiyyə edib.
Görüşdə çıxış edən tələbələr və onların valideynləri göstərilən diqqətə görə minnətdarlıqlarını
ifadə ediblər.

Milli.Az