İqtisadiyyat

Komitə sədri: “İran, Rusiya və Azərbaycanın elektrik şəbəkələrinin birləşdirilməsi araşdırılır”

30 İyul 2020 19:15

Baxış: 1 622

#IRAN #RUSİYA #ELEKTRİK ENERJİSİ #AZƏRBAYCAN

İran, Rusiya və Azərbaycanın elektrik şəbəkələrinin birləşdirilməsi layihəsi araşdırma mərhələsindədir.

Milli.Az xəbər verir ki, bunu APA-nın Tehran bürosuna açıqlamasında İranın Elektrik Enerjisi Sənayesi İttifaqının İxracat komitəsinin sədri Pəyam Baqiri deyib.

O bildirib ki, elektrik enerjisinin ötürülməsi üçün ən yaxşı istiqamətin seçilməsi və elektrik dirəklərin quraşdırılması üçün araşdırma aparılır.

P. Baqirinin sözlərinə görə, 3 ölkə arasında elektrik şəbəkələrinin sinxronlaşdırılması aparıldıqdan sonra İran elektrik sənayesi güclü və davamlı elektrik şəbəkəsindən faydalanacaq: "Bu enerjinin əsas qütblərindən birinə çevriləcək və çoxlu gəlir əldə edəcək. Azərbaycan elektrik enerjisinin ötürülməsi üçün strateji yollardan biridir, birbaşa İran və Rusiyanın elektrik enerjisindən faydalanacaq. Elektrik şəbəkəsinin sinxronlaşdırılması Azərbaycan üçün çox faydalı olacaq".

Komitə sədri qeyd edib ki, İran və qonşu ölkələr arasında enerjidən ən çox istifadə edilmə vaxtları bir-birindən fərqlənir: "Bu, İran, Azərbaycan və Rusiya arasında enerji mübadiləsinin ən önəmli tərəfidir. Ölkələr arası enerji mübadiləsində bu məsələ çox önəmlidir. İranda ilin bəzi fəsillərində daha çox elektrik enerjisinə ehtiyac var və bu ehtiyac qonşu ölkələr vasitəsilə təmin olunacaq. İranda daha elektrik stansiyası tikməyə və yeni elektrik enerjisi ötürücü xətlərinə sərmayə yatırmağa ehtiyac qalmayacaq. Bu məsələ Azərbaycan və Rusiya üçün də belədir".

Milli.Az