İqtisadiyyat

Salih Yılmaz: "TANAP Azərbaycan qazının Türkiyə və Avropaya nəqli üçün böyük imkanlar açacaq"

2 Dekabr 2019 14:28
Baxış: 1 059
VTB-də MİNİMAL FAİZ DƏRƏCƏSİ İLƏ NAĞD KREDİT 10.49%-dən

Trans-Anadolu qaz kəmərinin (TANAP) işə salınması Azərbaycan qazının Türkiyə və Avropaya nəqli üçün böyük imkanlar açacaq.

Milli.Az xəbər verir ki, bunu Trend-ə türkiyəli ekspert Salih Yılmaz deyib.

O bildirib ki, TANAP-ın açılışı Türkiyənin enerji təhlükəsizliyini möhkəmləndirəcək:

"Türkiyə üçün layihə o baxımdan maraqlıdır ki, birincisi, ölkə ildə 6 milyard kubmetr Azərbaycan qazı əldə edəcək, ikincisi bu, tədarükün təhlükəsizliyini təmin edəcək. Bu layihə həm də Avropanın marağındadır".

Ekspertin sözlərinə görə, TANAP Azərbaycan, Türkiyə və Avropa İttifaqı arasında iqtisadi və siyasi əməkdaşlığın genişlənməsinə xidmət edəcək:

"Hesab edirəm ki, Azərbaycan TANAP və ümumilikdə Cənub Qaz Dəhlizi sayəsində Avropanın enerji təhlükəsizliyinin təmin olunmasına böyük töhfə verəcək. Ona görə də Trans-Anadolu qaz kəmərinin tikintisinin başa çatması TANAP Azərbaycan, Türkiyə və Avropa üçün tarixi hadisədir".

Qeyd edək ki, noyabrın 30-da Türkiyənin Ədirnə şəhərinin İpsala qəsəbəsində Trans Anadolu Təbii Qaz Boru Kəmərinin (TANAP) Avropa bağlantısının (Faza-1) açılış mərasimi keçirilib.

Xəzərin Azərbaycan sektorundakı "Şahdəniz-2" yatağından çıxarılan qazı Türkiyəyə və bu ölkədən Avropaya nəql edəcək TANAP "Cənub Qaz Dəhlizi"nin tərkib hissəsi olan bir layihədir. TANAP Türkiyə-Gürcüstan sərhədində Cənubi Qafqaz Boru Kəmərinə, Türkiyə-Yunanıstan sərhədində isə "Trans-Adriatik" (TAP) qaz boru kəmərinə birləşəcək. Uzunluğu 1810 kilometr olan TANAP-ın ilkin ötürücülük qabiliyyəti 16 milyard kubmetrdir və sonradan bu həcmin 31 milyard kubmetrədək artırılması imkanı var.

TANAP-ın səhmdarlarının bu layihədə payı belədir: "Cənub Qaz Dəhlizi" QSC - 58 faiz, "Botaş" - 30 faiz və BP şirkəti - 12 faiz.

Xatırladaq ki, TANAP ilə ilk qaz ötürülməsi 2018-ci il iyunun 12-də Türkiyənin Eskişəhər vilayətində baş tutub və həmin il iyun ayının sonuna Türkiyəyə qazın kommersiya tədarükləri başlayıb. 2018-ci il iyunun 30-dan 2019-cu il oktyabrın sonuna TANAP ilə qaz tədarükü 3,08 milyard kubmetr təşkil edib.

Milli.Az

Azernews Newspaper

XƏBƏR LENTİ

Copyright © 2024 Milli.Az

Saytdakı materialların istifadəsi zamanı istinad edilməsi vacibdir. Məlumat
internet səhifələrində istifadə edildikdə hiperlink vasitəsi ilə istinad mütləqdir.