Azərbaycan nefti yenidən bahalaşdı

İtaliyanın Augusta limanında CIF bazisi üzrə Azərbaycanın "Azeri Light" markalı neftinin qiyməti əvvəlki göstərici ilə müqayisədə 0,87 ABŞ dolları və ya 0,81 faiz artaraq bir barel üçün 108,18 ABŞ dollarına çatıb.

Bu barədə neft bazarı iştirakçılarının məlumatında bildirilib.

Qeyd olunub ki, Türkiyənin Ceyhan limanında FOB bazisi üzrə "Azeri Light" markalı neftin bir barelinin qiyməti 0,76 ABŞ dolları və ya 0,73 faiz artaraq 104,99 ABŞ dolları təşkil edib.

"Urals" markalı xam neftin qiyməti əvvəlki göstərici ilə müqayisədə 0,35 ABŞ dolları və ya 0,43 faiz artaraq bir barel üçün 81,95 ABŞ dollarına çatıb.
Şimal dənizində hasil edilən "Dated Brent" markalı neftin qiyməti isə əvvəlki göstərici ilə müqayisədə 2,17 ABŞ dolları və ya 2,04 faiz artaraq bir barel üçün 108,68 ABŞ dolları olub.

Azərbaycanın 2026-ci il dövlət büdcəsində bir barel neftin orta qiyməti 65 ABŞ dolları səviyyəsində hesablanıb.

"Trading Economics"in məlumatına görə, çərşənbə günü xam neftin qiyməti bir barel üçün 94 dollardan yuxarı qalxaraq son üç ayın ən yüksək səviyyəsinə çatıb. Bildirilib ki, buna səbəb İranın Fars körfəzində iki ABŞ gəmisinə və səkkiz neft tankerinə zərbə endirdiyini açıqlaması olub. "Eskalasiyanın qlobal neft tədarükündə daha ciddi fasilələrlə bağlı narahatlıqları artırdığı bildirilir.
Tehran həmçinin İordaniyaya doğru ballistik raketlər buraxıb və Fars körfəzindəki gəmilərə xəbərdarlıq edərək Küveyt və Bəhreyn limanları yaxınlığında olan tankerlərin ekipajlarını "dərhal gəmilərini tərk etməyə" çağırıb.

Son hücumlar ABŞ-ın İranın əsas neft ixrac mərkəzi olan Xark adası yaxınlığında beş İran tankerinə zərbə endirməsindən sonra baş verib.

Digər tərəfdən, İranın dəstəklədiyi husilər Səudiyyə Ərəbistanının cənubundakı enerji infrastrukturunu, o cümlədən gündəlik 400 min barel neft emal gücünə malik Cizan neft emalı zavodunu hədəfə alıblar.

Bu arada, Çində neftə tələbatın artması Afrika, Kanada və Latın Amerikasından tədarük olunan xam neftin qiymətlərini yüksəldir. Hörmüz boğazında yaranan fasilələr fonunda neft emalı zavodları alternativ tədarük mənbələri axtarır və daha uzaq bazarlardan neft almağa yönəlirlər", - məlumatda qeyd edilib.

Müəllif: Malik Məlikov (Milli.Az redaktor)