Əməkdar artist istefa səbəbini AÇIQLADI - Yenilənib

Xəbər verdiyimiz kimi, Azərbaycan Pantomim Teatrının direktoru, Əməkdar artist Elman Rəfiyev istefa ərizəsi yazaraq işindən ayrılıb. 

Milli.Az xəbər verir ki, aktyor Azxeber.com-a açıqlamasında işdən 6 ay öncə ayrıldığını bildirib:

"İki gündür telefonlarım susmur, eşidən hər kəs zəng edir. İlk və son dəfə bu haqda danışacağam. Bu istefa 6 ay öncə baş verib, sadəcə sizə məlumat gec çatıb. Bunun səbəbini isə birbaşa Mədəniyyət Nazirliyindən soruşmaq lazımdır. Onların bu barədə açıqlama verməməsinin səbəbi nədir, bilmirəm. Mənim yerimə təyinat da olub".

Aktyor teatrda çalışması üçün ona heç bir şərait yaradılmadığını qeyd edib: 

"Rəhbərlikdən istefa versəm də, orada aktyor kimi çalışmağıma belə heç bir şərait yaratmadılar. Mən Pantomim teatrının yaradıcısıyam. Bu teatrın adı gələndə mən yada düşürəm. Hal-hazırda işsizəm. Aktyor hər yerdə çalışa bilər, sadəcə gərək təklif gəlsin. Mən kiminsə qapısında oturub iş istəyən deyiləm, heç vaxt da belə biri olmamışam. İndidən sonra da bunu etməyəcəyəm. Hazırda Dövlət Televisiyasında "Fatehlərin divanı" televiziya tamaşasında həm aktyorlar üzrə rejissoram, həm də rol alıram. İncəsənət aləminin mənə ehtiyacı var, amma verilən qiymət çox dəyərsizdir və mən tək deyiləm. Bizim dəstəmiz çox böyükdür. Bu acı reallıqdır".

Əməkdar artist bildirib ki, Mədəniyyət Nazirliyinin nə üçün 6 ay müddətində bu xəbəri ictimaiyyətlə bölüşməməsindən xəbərsizdir:

"Mən bilmirəm nə üçün Mədəniyyət Nazirliyi 6 aydır bununla bağlı heç bir açıqlama verməyib. Nə üçün? Çox maraqlıdır. Və birdən-birə bu xəbər medianın gündəminə düşür və mən ölkədə ən çox axtarılan adam oluram. Bəs indiyə qədər niyə mən heç kimin yadına düşmürdüm? Bu çox acınacaqlı haldır. Çünki Azərbaycanda Pantomim deyəndə mən yada düşürəm, Elman Rəfiyev yada düşür. Mən bu işin tarixini yazmışam. Məni bu tarixdən kimsə silə bilər? Xeyr! Mən tarixdə əbədi olaraq qalacağam!".

----------------

2025.07.09

Dövlət Pantomima Teatrının direktoru, əməkdar artist Elman Rəfiyev işdən çıxıb.

O, bir müddət əvvəl tutduğu vəzifədən kənarlaşıb. 

Mədəniyyət Nazirliyindən Lent.az-ın sorğusuna cavab olaraq faktı təsdiqləyiblər.

Bildirildi ki, Elman Rəfiyev bir müddət əvvəl öz xahişi ilə ərizə yazaraq işdən ayrılıb. 

Qeyd edək ki, Elman Rəfiyev 2009-cu ildən Dövlət Pantomima Teatrının direktoru postunu tutub.

Bir neçə il əvvəl teatrın dövlətə 150 min manatdan çox vergi borcunun olması barədə xəbərlər yayıldı.

Bundan sonra Elman Rəfiyevin ölkədən çıxışına da qadağa qoyulmuşdu.

Milli.Az