Ölkə

Qubada bir kəndin uşaqları təhsildən kənarda qala bilər - VİDEO

18 Sentyabr 2021 11:24

0 Şərh Baxış: 1 624

#TƏHSİL #VİDEO

Qubada məktəbliləri daşıyan avtobus marşrutu ləğv edilib. Ona görə də, Quba rayonunun Yalavanc kəndinin uşaqları bu il təhsildən kənarda qalacaqlarından şikayətlənirlər.

Milli.Az XƏZƏR TV-yə istinadən bildirir ki, kəndlərindəki məktəbdə sadəcə ibtidai siniflər təhsil ala bildiyi üçün orta sinif şagirdləri 2019-cu ildən etibarən ən yaxın təhsil müəssisəsinə - Şabran rayonunda yerləşən 2 nömrəli məktəbə gedirdilər.

Kənddən məktəbə qədər məsafə 8 km olduğundan həmin vaxtlar uşaqları məktəbə aparıb-gətirmək üçün Quba Rayon İcra Hakimiyyəti tərəfindən marşrut avtobusu ayrılıb və sürücüyə aylıq 500 manat məbləğində pul ödənilib. Hazırda o marşrut ləğv olunub. İndi valideynlər övladlarının aqibətinin nə olacağını düşünürlər.

Valideynlər bununla bağlı dəfələrlə Quba Rayon İcra Hakimiyyətinə müraciət etdiklərini deyirlər. Biz də məsələ ilə bağlı Quba Rayon İcra Hakimiyyəti ilə əlaqə saxladıq.

İcra başçısının birinci müavini Tariyel İbrahimov "Xəzər Xəbər"ə bildirib ki, əvvəllər avtobus İcra Hakimiyyətinin vəsaiti hesabına təmin edilə bilirdi. İndi isə belə vəsait olmadığından qeyd olunan məsələ üzrə pul ayırmaq mümkün olmayacaq.

Kənd məktəbinin tipinin 9 illiyə dəyişdirilməsi ilə bağlı məsələyə gəldikdə isə, Quba Rayon Təhsil Şöbəsinin müdiri Rüfət Hacıyev qeyd edib ki, bu məsələ müzakirə olunur və müvafiq sənədlər Təhsil Nazirliyinə göndəriləcək.

Şöbə müdiri bildirib ki, məktəbin tipinin nə vaxt dəyişdirilməsi isə təhsil nazirinin əmrindən asılıdır.

Xezerxeber.az mövzu ilə bağlı daha ətraflı videomaterialı təqdim edir:

Milli.Az