Ölkə

Azərbaycanda istilik mövsümü uzadılacaq? - AÇIQLAMA

7 Aprel 2026 11:46

Baxış: 3 828

VTB-də minimal faiz dərəcəsi ilə nağd kredit 9.9%-dən

#BAKI #İSTİLİK

Aprelin 15-də Bakıda sonunda isə 9 dağ rayonunda istilik mövsümü başa çatacaq, lakin hava temperaturu hələ də aşağı səviyyədə qalır. Bu səbəbdən bəzi ərazilərdə sakinlər istiliklə bağlı çətinlik hiss edə bilərlər.

Belə halda istilik mövsümü uzadıla bilər?

Məsələ ilə bağlı Milli.Az-ın sualına cavab olaraq "Azəristiliktəchizat" ASC-nin PR meneceri Rüxsarə Babayeva bildirib ki, payız-qış mövsümünün başlanılması və başa çatdırılması tarixləri qanunvericiliklə tənzimlənir.

"Belə ki, Azərbaycan Respublikası Nazirlər Kabinetinin 5 sentyabr 2023-cü il tarixli, 303 nömrəli qərarı ilə təsdiq edilmiş "İstilik enerjisindən istifadə qaydaları"na əsasən, respublikanın dağlıq rayonlarında 1 noyabr tarixindən, Bakı şəhəri və digər ərazilərdə isə 15 noyabr tarixindən etibarən istilik verilişinə başlanılıb."

R. Babayeva qeyd edib ki, Bakı şəhəri və respublikanın regionlarında 2025-2026-cı illər payız-qış mövsümü müvafiq qanunvericiliyə əsasən 15 aprel tarixində başa çatacaq.

"Cəmiyyətin qazanxanalarının fəaliyyət göstərdiyi 9 dağ rayonu (Şuşa, Qəbələ, Quba, Qusar, Xaçmaz, Siyəzən, Şabran, Lerik və Şamaxı) qanunvericiliyə əsasən mövsümün 1 may tarixinədək davam etdirilməsi nəzərdə tutulub."

R. Babayeva vurğulayıb ki, təcrübədə hava şəraitinin kəskin olmasına görə istilik mövsümünün uzadılması halı olub.

"Lakin hazırda bu gündəmdə deyil", - deyə o əlavə edib.

Ayxan
Milli.Az