Azərbaycanda A-frame evlərin qiyməti: Kiçik büdcə ilə müasir yaşayış mümkündürmü?

Ölkəmizdə taxtadan tikilən A-frame tipli evlər son illərdə həm estetik görünüşü, həm də nisbətən sadə konstruksiyası səbəbindən populyarlıq qazanıb.

Belə evlərin tikintisi və satışı ilə məşğul olan Orxan Hacılı Milli.Az-a bildirib ki, bu tip evlər adını xarakterik üçbucaq formasından alır.

"Dam örtüyü eyni zamanda divar funksiyasını da yerinə yetirir və konstruksiya yerə doğru enən iki maili səthdən ibarət olur. Strukturun bu sadəliyi tikinti prosesini asanlaşdırır və bir sıra hallarda xərclərin azalmasına imkan verir. A-frame evlərin əsas üstünlüklərindən biri material və əmək sərfinin az olmasıdır. Klassik evlərlə müqayisədə əlavə daşıyıcı divarlara və mürəkkəb beton işlərinə daha az ehtiyac yaranır. Bu isə tikinti müddətini qısaldır və ümumi büdcəyə müsbət təsir göstərə bilər. Taxtanın özü də düzgün emal və izolyasiya olunduqda yaxşı istilik xüsusiyyətlərinə malikdir. Nəticədə belə evlər kiçik yaşayış sahəsi, bağ evi, istirahət evi və ya turizm məqsədli obyekt kimi praktik seçim sayılır. Bununla belə, A-frame evlərin müəyyən məhdudiyyətləri də var. Üçbucaq forma səbəbindən daxili məkanın bir hissəsi maili divarlar altında qalır və istifadə edilə bilən sahə azala bilər. Daimi yaşayış üçün nəzərdə tutulduqda əlavə istilik və səs izolyasiyası, həmçinin kommunikasiya xərcləri tələb oluna bilər. Taxta materialın iqlim şəraitinə davamlılığı üçün qoruyucu örtüklər və müntəzəm texniki qulluq da vacibdir".

O.Hacılı bildirib ki, Azərbaycanda bu tip evlərin tikinti qiyməti layihənin ölçüsü, material keyfiyyəti və görülən işlərin həcminə görə dəyişir.

"Bazarda orta hesabla A-frame tipli taxta evlərin dəyəri təxminən 400-600 AZN/m² aralığında formalaşır. Bu göstərici adətən konstruksiya və əsas tikinti işlərini əhatə edir, lakin əlavə izolyasiya, mühəndis-kommunikasiya sistemləri və interyer həlləri yekun qiymətə təsir göstərə bilər. Məsələn, 80 m² sahəsi olan orta ölçülü A-frame evin tikintisi təxminən 32 000 - 48 000 AZN civarında, daha kiçik - 50 m² modellər isə təxminən 20 000 - 30 000 AZN aralığında başa gələ bilər. Ümumilikdə, A-frame evlər düzgün planlaşdırma və məqsədə uyğun layihələndirmə olduqda sərfəli və funksional tikinti variantı hesab edilə bilər. Ən dəqiq büdcəni müəyyənləşdirmək üçün isə konkret layihə üzrə hesablamanın aparılması vacibdir", - deyə o qeyd edib.

Ayxan
Milli.Az