Bu reys gecikir, Hindistana uçuş isə təxirə salındı - YENİLƏNİB

11:18

"Azərbaycan Hava Yolları" (AZAL) aviaşirkətinin Bakıdan Rusiyanın Moskva şəhərinə planlaşdırılan J2-181 ("Domodedovo" aeroportu) və J2-807 ("Vnukovo" aeroportu) nömrəli reysləri təyinat məntəqəsində hava məkanının bağlı olması səbəbindən gecikir.

Bu barədə Milli.Az-a "Azərbaycan Hava Yolları" QSC-nin Mətbuat xidmətindən bildirilib.

Qeyd olunub ki, gecikən reyslərin sərnişinləri aviaşirkətin qaydalarına uyğun olaraq bütün zəruri vasitələrlə təmin olunurlar.

Eyni zamanda, AZAL-ın Bakıdan Hindistanın Mumbay şəhərinə planlaşdırılan J2-059 nömrəli reysi Pakistan üzərində hava məkanının bağlı olması səbəbindən təxirə salınıb.

AZAL uçuşların təhlükəsizliyini rəhbər tutaraq vəziyyəti diqqətlə izləməyə davam edir və sərnişinləri yeniliklər barədə məlumatlandıracaq.

10:17

Bu gün səhər saatlarında Moskvanın hava limanlarında pilotsuz təyyarələrin hücumu səbəbindən təhlükəsizlik tədbirləri görülüb və paytaxta uçan bir neçə təyyarə, o cümlədən Bakı-Moskva reysi Saratovdakı Qaqarin Beynəlxalq Hava Limanına endirilib.

Rusiya mediasının məlumatına görə PUA-ların hücumu zamanı Moskva üzərində hava hücumundan müdafiə sistemləri işə salınıb. Domodedovo, Vnukovo və Şeremetyevo hava limanlarında uçuşlar məhdudlaşdırılıb. Qaqarin Hava Limanının sözçüsü bildirib ki, yönləndirilən reyslər arasında Tbilisi, Qazipaşa, Bakı, Düşənbə, Daşkənd, Soçi, Stavropol və Mineralnıye Vodı şəhərlərindən gələnlər də var. Təyyarələr yerə endikdən sonra sərnişinlərlə aviaşirkət nümayəndələri əlaqə saxlayıb, onların Moskvaya uçuşu hava məkanındakı məhdudiyyətlər aradan qalxdıqdan sonra bərpa olunacaq.

Qeyd edək ki, Rusiya Federal Hava Nəqliyyatı Agentliyi bu cür hallarda təyyarələrin alternativ hava limanlarına yönləndiriləcəyini əvvəlcədən xəbərdar etmişdi. Hazırda hücumla bağlı araşdırma aparılır.

İslam
Milli.Az