Pulunu alıb, sonra buraxdılar - YENİLƏNİB

Hindistan gömrüyündə saxlanılan politoloq Turab Rzayev Bakıya qayıda bilib.

Milli.Az bildirir ki, bu barədə Axar.az-a politoloq özü məlumat verib.

O bildirib ki, üzərindəki bütün pul müsadirə olunduqdan buraxılıb:

"Saxlanılmağım üçün heç bir əsas yox idi. Əsas məsələ pulun müsadirə olunmasıydı. Üzərimdə 7 nəfərin xərci üçün nəzərdə tutulan 12 min dollar həcmində məbləği məndən aldılar - yeni bilet almağım, oteldə qalmağım üçün bir qəpik də saxlamadılar. Məcbur qalıb, Bakı ilə əlaqə saxladıb, buradan bilet aldırdım. Mənə telefon və internet əlaqəsi belə yaratmırdılar".

O, saxlanılmasında Azərbaycana qarşı qərəzli münasibəti olan şəxslərin rolu olduğunu bildirib:

"Əvvəlcə, gömrük kəşfiyyatı saxlamışdı. Onlar rüşvət istəyirdilər. Daha sonra iş gömrüyün özünə yönləndirildi. Gömrüyün şöbə müdirləri mənim yanımda rəislərinə müraciət etdilər ki, burax, getsin. Ancaq gömrükdə müavin vəzifəsində çalışan şəxs qatı millətçi, antiazərbaycan mövqeyində idi və saxlanılmağıma israr elədi. Konsulluq, mən özüm onunla görüşsəm də, o, buraxılmamağım üçün qəti mövqe sərgilədi. Halbuki bütün gömrük işçiləri qanun pozuntusu olmadığını, buraxılmalı olduğumu tələb edirdilər. Mən saxlanılanda gömrük işçiləri belə etiraf elədilər ki, bir sən deyilsən, Azərbaycandan gələnlərin əksəriyyəti qərəzli şəkildə bu münasibətlə qarşılaşır. Hava limanında azərbaycanlı sərnişinlərə qarşı bu kimi vəziyyətlərdən qəsdən sui-istifadə edilir, onlar incidilirlər".

----------------

2024.12.09

Tanınmış politoloq Turab Rzayev Bakıya qayıdarkən Hindistan gömrüyündən buraxılmayıb.

Milli.Az xəbər verir ki, bu barədə o özü məlumat yayıb.

Məlumata görə, saxlanılmasına səbəb kimi onun tez-tez Hindistana səfər etməsi göstərilib.

"Hindistan gömrüyündə dedilər ki, çox gedib-gəlirsən, gəl, qonağımız ol", - o, paylaşımında bildirib.

Məsələ ilə bağlı açıqlama verən politoloq gömrükçülərin onu buraxmaq üçün pul istədiklərini bildirib.

"Üstümdəki pulun hamısını istəyirlər".

Milli.Az