Ölkə

Bağ evlərinin kirayə qiymətləri ARTDI

2 İyul 2024 15:49

Baxış: 779

#QİYMƏT #EV

Yay mövsümünün başlanması ilə daxili turizmə tələbat artıb. İnsanlar da dincəlmək üçün Bakı ətrafında yerləşən bağ evlərinə və dağlıq ərazilərə üz tuturlar.

Bunun da həmin ərazilərdə yerləşən kirayə qiymətlərinə təsiri qaçılmazdır.

Milli.Az bildirir ki, məsələ ilə bağlı "Trend"ə açıqlamasında əmlak məsələləri üzrə ekspert Ramil Osmanlı bildirib ki, artıq belə ərazilərdə yerləşən evlərin kirayə qiymətləri artıb.

"Bu hər il davam edən tendensiyadır. Qiymət artımı avqust ayının 10-na qədər davam edəcək. Avqustdan sonra evlərin kirayə qiymətləri azalacaq. Çünki bağ evlərinə kirayəsi əsasən mövsümi xarakter daşıyır.

Hazırda Bakı və Abşeronda dənizkənarı kirayə evlərin qiyməti aylıq 1500 manatdan başlayaraq 6000 manata qədər və ondan daha bahadır. Dənizkənarı olmayıb, lakin əlverişli şəraiti olan bağ evlərinin də qiymətində artım var. Ərazinin infrastrukturundan asılı olaraq qiymətlərdə fərqlər var. Ən baha kirayə mənzillər Mərdəkan, Bilgəh və Novxanı qəsəbələrindədir", - o deyib.

Ekspert bildirib ki, bölgə olaraq isə, bu il ən populyar şimal və cənub rayonlarıdır.

"Həmişə ilk yerlərdə olan İsmayıllıya gedən yolda təmir aparıldığından həmin istiqamətə gedənlərin sayı azalıb.

Ümumi olaraq götürdükdə turizm bölgələrində günlük kirayə mənzilin qiyməti şəraitinə görə 50-500 manat arasında dəyişir", - deyə o qeyd edib.

Mərdəkanda bağını kirayə verən Orxan Əliyev bildirib ki, bu il ötən illə müqayisədə tələbat artıb.

"Bu da qiymətə təsir edib. Belə ki, ötən il ikiotaqlı və hovuzu olan evimi 1500 manata kirayə verirdimsə, bu il qiymət 1800 manatdır", - deyə sakin qeyd edib.

Milli.Az
Xəbərlərimizi WhatsApp kanalımızdan da oxuyun