Ölkə

Köndələnçaydakı su anbarı nə qədər ərazini su ilə təmin edəcək? - AÇIQLAMA - FOTO

14 May 2024 12:32
Baxış: 401
VTB-də MİNİMAL FAİZ DƏRƏCƏSİ İLƏ NAĞD KREDİT 10.49%-dən

Prezidentin izi ilə Füzuli rayonuna təşkil olunan media tura start verilib.

Milli.Az Trend-ə istinadən xəbər verir ki, media nümayəndələri ilk olaraq Füzulidə Prezident İlham Əliyev tərəfindən açılışı olan Köndələnçay su anbarları kompleksində olublar.

Media nümayəndələrinə məlumat verilib ki, Füzuli rayonu ərazisində, 1962-ci ildə istismara verilən Köndələnçay çayının məcrasında tikilmiş ümumi su tutumu 3,9 milyon kubmetr (faydalı həcmi 3,6 milyon kubmetr), hündürlüyü 14 metr olan Köndələnçay-1 və 1951-ci ildə istismara verilən ümumi su tutumu 2,1 milyon kubmetr (faydalı həcmi 1,6 milyon kubmetr), hündürlüyü 23,35 metr olan Köndələnçay-2 su anbarlarında təmir-bərpa işləri həyata keçirilib.

Azərbaycan Dövlət Su Ehtiyatları Agentliyinin əməkdaşı Atakişi Babayev bildirib ki, məqsəd bəndin qurğularının və mexaniki avadanlıqlarının sabit iş rejiminə gətirilməsi və bundan sonrakı istismarı üçün normal vəziyyətinin yaradılmasıdır.

"Köndələnçay-1 su anbarında layihə əsasında torpaq bəndin yuxarı byefində dağıdılmış berman və bütün bənd boyu beton üzlüyü, qülləli suburaxıcı-sutullayıcının estakadası və çıxış hissəsi, eni 6 metr, uzunluğu 283 metr olan səthi sutullayıcı yenidən bərpa olunub. Köndələnçay-2 su anbarında isə daş örtüklü torpaq bəndin yuxarı byefində çökmüş daş örtüyü bərpa olunub, drenaj sistemi və nəzarət ölçü cihazları quraşdırılıb, suburaxıcı borunun çıxış başlığının dağılmış beton hissəsi bərpa edilib, diametri 600 millimetr olan siyirtmələr yenilənib, aparıcı kanal lildən təmizlənib, qurğunun beton konstruksiyası, uzunluğu 177 metr olan səthi sutullayıcının dəmir-beton üzlüyü yenidən qurulub.

Həmçinin, hər iki su anbarında gözətçi evi və çirkab su quyusunun tikintisi, xarici elektrik təchizatının təmin edilməsi, ərazidə abadlıq və yaşıllaşdırma işləri görülüb".

Agentliyin əməkdaşı onu da qeyd edib ki, 1980-ci ildə istismara verilən, ümumi su tutumu 9,5 milyon kubmetr (faydalı həcmi 9 milyon kubmetr), hündürlüyü 25 metr olan Aşağı Köndələnçay su anbarında da təmir-bərpa işləri həyata keçirilib.

"Bu su anbarında da daş örtüklü torpaq bəndin yuxarı byefində çökmüş daş örtüyü bərpa olunub, drenaj sistemi və nəzarət ölçü cihazları quraşdırılıb, qülləli suburaxıcının yükdaşıyan elementlərinin dəmir-beton konstruksiyaları, dib borusunun bütün mexaniki və qaldırıcı avadanlıqları, qurğunun estakadası metal və beton konstruksiyaları, eni 6 metr, uzunluğu 780 metr olan səthi sutullayıcının bütün beton konstruksiyaları, binanın mexaniki və hidromexaniki avadanlıqları yenidən qurulub, yarımstansiya və elektrik xətti bərpa olunub, Quruçay üzərində suqəbuledici qurğu tikilib. Quruçaydan gələn sular su anbarına yönəldiləcək".

Agentliyinin əməkdaşı bildirib ki, su anbarları Füzuli rayonu ərazisində ümumilikdə 6300 hektar əkin sahəsinin suvarılmasına xidmət edir:

"Su anbarları ümumilikdə 6300 hektar ərazinin suvarılmasına xidmət edir. Bundan 5080 hektarı işğaldan azad edilmiş əraziyə düşür. Hazırda bu su anbarları vasitəsilə Füzuli rayonu ərazisində suvarma işləri həyata keçrilir. İşğal dövründə su anbarları bərbad vəziyyətdə idi. Qış aylarında anbarın suyunu buraxırdılar. Yay aylarında suvarmaya ehtiyac olan vaxtda isə suyu buraxmırdılar".

Milli.Az
Xəbərlərimizi WhatsApp kanalımızdan da oxuyun

Məqaləyə dair fotomateriallar:

Azernews Newspaper

XƏBƏR LENTİ

Copyright © 2024 Milli.Az

Saytdakı materialların istifadəsi zamanı istinad edilməsi vacibdir. Məlumat
internet səhifələrində istifadə edildikdə hiperlink vasitəsi ilə istinad mütləqdir.