Sürücülərə VACİB XƏBƏR: Bakıda iki mərkəzi küçə 3 gün bağlı olacaq

Bakının mərkəzi prospektlərindən biri - paytaxtın Səbail rayonu ərazisində yerləşən Neftçilər prospektində, eləcə də Akademik Zərifə Əliyeva küçəsində aparılan təmir işləri ilə bağlı yol polisi sürücülərə müraciət edib.

Bakı şəhər Baş Polis İdarəsinin Dövlət Yol Polisi İdarəsinin baş inspektoru, polis mayoru Araz Əsgərlinin Milli.Az-a verdiyi xəbərə görə, qeyd olunan yollar 3 gün ərzində - 12, 13 və 14 mart (bazar günündən çərşənbə axşamı daxil olmaqla) asfalt örtüyü ilə əvəzlənəcək və avtomobillərin hərəkəti üçün bağlanacaq:

"Bununla əlaqədar olaraq, Azneft dairəsindən Yusif Səfərov küçəsinə doğru (Cavanşir körpüsünə doğru) getmək istəyən sürücülər alternativ yoldan istifadə etməlidirlər.

Marşrut aşağıdakı kimidir:

- Azneft dairəsindən yuxarı Niyazi küçəsi ilə sağa dönmə ilə İstiqlaliyyət küçəsi ilə (İçərişəhər metrosu)

- Daha aşağı Mirzə Ələkbər Sabirin abidəsinə qədər, sonra sola, Azərbaycan prospektinə (Monolit və Azərbaycan Respublikası Daxili İşlər Nazirliyinin binasına doğru)

- Daha sonra Beşmərtəbədən sağa, Şəmsi Bədəlbəyli küçəsinə dönün və Azadlıq prospektinə çıxışla irəli (28 Mall)

- Orada prospektə sağa, sonra Nizami küçəsi ilə kəsişmədən sola və Nizami küçəsi ilə düz Yusif Səfərov küçəsi ilə kəsişməyə doğru hərəkət etmək lazımdır".

Bunu nəzərə alaraq, sürücülərdən qeyd olunan ərazilərdə şəxsi avtomobillərdən mümkün qədər az istifadə etmək xahiş edilir.

Eyni zamanda, 12, 13 və 14 mart tarixlərində Neftçilər prospektində, eləcə də Akademik Zərifə Əliyeva küçəsində aparılacaq təmir işləri ilə bağlı nəqliyyat vasitələrin hərəkətinə qoyulacaq məhdudiyyətə görə bir neçə marşurt avtosunun hərəkət sxemi dəyişdiriləcək.

Bu barədə Bakı Nəqliyyat Agentliyindən (BNA) məlumat verilib.

Məlumata görə, məhdudiyyət səbəbindən 1,2,4,5,10,18,21,30,32,46,49,88,125,127,175,H1,M3 nömrəli müntəzəm marşrutların hərəkət sxemi alternativ (Əhməd Cavad küçəsi, Niyazi küçəsi, İstiqlaliyyət küçəsi, Azərbaycan prospekti, Şəmsi Bədəlbəyli küçəsi, Azadlıq prospekti,Nizami küçəsi,) küçələrlə təşkil ediləcəkdir.

Milli.Az