Yanvarın 9-dan 12-dək bu yollar buz bağlayacaq - Növbəti xəbərdarlıq - YENİLƏNİB - VİDEO

11:01

Ölkə ərazisində müşahidə olunan yağıntılı, qarlı və şaxtalı hava şəraiti ilə əlaqədar olaraq yanvar ayının 9-dan 12-dək avtomobil yollarının buz bağlayacağı gözlənilir.

Milli.Az xəbər verir ki, Hidrometeoroloji Proqnozlar Bürosunun direktoru Gülşad Məmmədova bildirib ki, Bakı və Abşeron yarımadasının, Bakı-Quba, Bakı-Şamaxı-Yevlax, Yevlax-Zaqatala, Quba-Qusar, Quba-Xaçmaz, Qusar-Xudat, Muğanlı-İsmayıllı, Qaraməryəm-İsmayıllı-Şəki, Ağsu-Kürdəmir-Bəhramtəpə, Göyçay-Bərgüşad, Qorağan-Qax-Zaqatala, Xaldan-Mingəçevir, Gəncə-Kəlbəcər-Laçın, Gəncə-Daşkəsən, Gəncə-Samux, Şəmkir-Gədəbəy, Yevlax-Xocalı-Laçın, Bərdə-İstisu, Xankəndi-Xocavənd, Şuşa-Füzuli, Ağdam-Hindarx-Ağcabədi, Ağdam-Ağdərə, Qubadlı-Xanlıq, Füzuli-Cəbrayıl-Mahmudlu, Bəhramtəpə-Biləsuvar, Hacıqabul-Şirvan, Masallı-Yardımlı, Lənkəran-Lerik avtomobil yollarının buz bağlayacağı ehtimal olunur:

"Bəzi avtomobil magistral yollarında dumanlı hava şəraiti ilə əlaqədar olaraq görünüş məsafəsinin 100-600 metrədək məhdudlaşacağı gözlənilir".

G.Məmmədova qeyd edib ki, hava şəraiti ilə bağlı sürücülərə ehtiyatlı olmaları tövsiyə olunur.

---------
09:54

Respublikada ümümi olaraq məhdudlaşdırılan yol yoxdur.

Bu barədə Milli.Az-a Baş Dövlət Yol Polisi İdarəsinin (DYP) Hərəkətin təhlükəsizliyinin təbliği ictimai qurumlarla əlaqələrin şöbəsinin rəisi, polis mayoru Rövşən Tağıyev məlumat verilib.

O bildirib ki, gecədən bəri bəzi rayonlarda qarın çox yağması ilə əlaqədar yol patrul xidmətinin bütün əməkdaşları gücləndirilmiş iş rejimində fəaliyyət göstərib:

"Təhlükəli yollarda avtomobillərin tək-tək hərəkətinə icazə verilməyib. Onlar kalon şəkilində hərəkət ediblər. Yol Polisi tərəfindən patrul təyin edilib və hərəkət edən kalonu müşahidə edib. Şamaxı-İsmayıllı yolunda isə yük avtomobillərin və sərnişin daşıyan avtobus, mikroavtobusların hərəkətinə icazə verilməyib. Onlara alternativ yol verilib. Patrulun müşahidəsi ilə hərəkət ediblər. Bundan başqa Azərbaycan Avtomobil Yolları Dövlət Agentliyi və Dövlət Yol Polisi əməkdaşları tərəfindən texnikalarla yollar qarlardan təmizlənir".

DYP rəsmisi bir daha sürücülərə müraciət edərək öncə nəqliyyat vasitəsinin texniki sazlığına diqqət yetirsinlər:

"Xahiş edirik ki, yola çıxan sürücülər təkərləri qış mövsümə uyğun eləsinlər. Çünki mövsümü təkərlərin olması avtomobillərin sürüşməsinə, yollarda qəzaların və yaxud tıxacların baş verməsinə gətirib çıxarır. Sürücülərdən bir daha xahiş edirik ki, yollarda təhlükəsizliyin təmin olunması üçün müraciətlərə diqqət yetirsinlər".

Milli.Az