Dünya

Avropa İttifaqında elektromobillərin sayında sürətli artım Latviyada müşahidə edilib

23 Noyabr 2020 22:44
Baxış: 478

Cari ilin 3 rübündə Latviyada qeydiyyatdan keçən elektromobillərin sayı ötən ilin müvafiq dövrü ilə müqayisədə 328 faiz artıb ki, bu da Avropa İttifaqında (Aİ) elektromobillərin sayında qeydə alınan ən böyük göstəricidir.

Milli.Az AZƏRTAC-a istinadən bildirir ki, bu barədə məlumatı Estoniyanın "RIA.com Marketplaces" beynəlxalq texnologiya şirkəti yayıb. Bildirilir ki, elektrik enerjisi ilə işləyən avtomobillərin satışı üzrə yüksək göstəricilər digər Baltikyanı ölkələrdə də müşahidə edilib.

Şirkətin məlumatına əsasən, 9 ay ərzində Estoniyada 253 ədəd bu cür avtomobil satılb ki, bu da keçən ilin eyni dövrünə nisbətən 208 faiz çoxdur. Litvada isə 3 rübdə 328 ədəd elektromobil satılıb ki, bu da keçən ilin analoji dövrü ilə müqayisədə 173 faiz çoxdur.

Qeyd edilib ki, Baltikyanı ölkələrdə elektromobillərin satışı üzrə artım tempi Aİ-də qeydiyyatdan keçmiş belə avtomobillərin artım sayını orta hesabla xeyli geridə qoyub. Ötən ilin 3 rübündə Aİ-də qeydiyyatdan keçmiş elektromobillərin sayı 256 min 863 ədəd idisə, bu ilin eyni dövründə onların sayı 570 min 278 təşkil edib. COVID-19 pandemiyasına baxmayaraq, Aİ-də elektromobillərin satışında 122 faiz artım müşahidə olunub.

Milli.Az

XƏBƏR LENTİ

Copyright © 2019 Milli.Az

Saytdakı materialların istifadəsi zamanı istinad edilməsi vacibdir. Məlumat
internet səhifələrində istifadə edildikdə hiperlink vasitəsi ilə istinad mütləqdir.