Dünya

Daha bir gəmidə virus aşkarlandı - 115 yoluxma

9 May 2026 18:49
Baxış: 411
VTB-də minimal faiz dərəcəsi ilə nağd kredit 9.9%-dən
#DÜNYADA

ABŞ-dən Karib hövzəsinə səfərə çıxan kruiz gəmisində norovirus infeksiyası aşkarlanıb.

Milli.Az qafqazinfo-ya istinadən xəbər verir ki, bu barədə ABŞ Xəstəliklərə Nəzarət və Profilaktika Mərkəzi (CDC) məlumat yayıb.

Bildirilib ki, gəmidə 102 sərnişin və 13 heyət üzvü virusa yoluxub.

Yoluxma halları "Caribbean Princess" kruiz gəmisində qeydə alınıb. Gəmi aprelin 28-də "Fort Lauderdale" limanından yola düşərək 13 günlük Karib dənizi turuna başlayıb. Onun mayın 11-də "Port Canaveral" limanına qayıtması planlaşdırılır.

Hazırda Şimali Atlantik sularında hərəkət edən gəminin növbəti dayanacağının Puerto-Plata olacağı bildirilib.

Mərkəzin açıqlamasına əsasən, yoluxma hallarının artmasından sonra gəmidə dezinfeksiya və təcrid tədbirləri gücləndirilib. Səhiyyə rəsmiləri gəmi Florida sahillərinə çatana qədər yoluxanların sayının arta biləcəyini istisna etmirlər.

Qeyd edək ki, norovirus, əsasən, qapalı və insanların sıx toplandığı məkanlarda sürətlə yayılan yoluxucu virus hesab olunur. Xəstəlik, adətən, şiddətli qusma, ishal, qarın ağrısı və halsızlıq kimi simptomlarla müşahidə edilir.

Virusla təmasdan sonra simptomlar 12-48 saat ərzində ortaya çıxır. Uşaqlarda daha çox qusma, böyüklərdə isə ishal halları üstünlük təşkil edir. Bəzi hallarda yüngül qızdırma və yorğunluq da qeydə alınır.

Səhiyyə qurumları xüsusilə sabun və su ilə əl yumağın virusdan qorunmaq üçün ən effektiv vasitələrdən biri olduğunu vurğulayırlar. Qeyd olunur ki, norovirus bəzi spirt əsaslı dezinfeksiyaedici vasitələrə qarşı davamlı ola bilər.

Milli.Az

Milli.Az - Xəbər Portalı
Azernews Newspaper

DİGƏR XƏBƏRLƏR

XƏBƏR LENTİ

Copyright © 2026 Milli.Az

Saytdakı materialların istifadəsi zamanı istinad edilməsi vacibdir. Məlumat
internet səhifələrində istifadə edildikdə hiperlink vasitəsi ilə istinad mütləqdir.