"Sovet dəmiryolçuları pərdələri çəkdilər": Tramp Bakı üzərindəki UFO-ları və "Apollon"a tutulan lazeri ifşa etdi

ABŞ-də Donald Tramp administrasiyası naməlum uçan obyektlərlə (UFO) bağlı məxfi sənədlərin dərcinə başlayıb.

Milli.Az xəbər verir ki, ABŞ Müdafiə Nazirliyinin saytında xüsusi bölmə yaradılıb və orada hazırda nazirliyin özü, FTB (FBI), NASA və Dövlət Departamentinin arxivlərindən götürülmüş 162 fayl yerləşdirilib. Hakimiyyət orqanları bu sənədləri "açılmamış işlər" adlandırıb və qeyd edib ki, hökumət bu hadisələrin təbiətini müəyyən edə bilməyib. Bölmənin hər bir neçə həftədən bir yeni fayllarla zənginləşdiriləcəyi vəd edilib. Bəzi fotoşəkillərdə xüsusi qeyd var: onlar "şahidlərin şəxsiyyətini, hökumət obyektlərinin yerini və ya hərbi obyektlər haqqında potensial məxfi məlumatları qorumaq üçün" redaktə edilib.

1955-ci il: Bakı səmalarında "uçan boşqablar"
Açıqlanan sənədlər arasında 1955-ci ildə Azərbaycan SSR-də səyahətdə olan üç amerikalının şahid ifadələri xüsusi diqqət çəkir. Bakı yaxınlığında qatarla gedərkən onlar səmada "uçan boşqablara bənzəyən" iki disk görüblər. Onların sözlərinə görə, obyektlər qəfildən yuxarı qalxıb, sonra isə sürətləri əhəmiyyətli dərəcədə artıb. "Obyekt vıyıldadı, düzəldi və sürətlə uzaqlaşdı", - deyə səyahətçilər bildiriblər. Onlar əlavə ediblər ki, bundan sonra sovet dəmiryolçuları "həyəcanlanıblar, pərdələri bağlayıblar və pəncərədən baxmağın qadağan olduğunu deyiblər".

Qazaxıstan üzərində "güllə" və "Apollon-11" sirləri
Məxfi materiallar arasında 27 yanvar 1994-cü ilə aid başqa bir şəhadətnamə də var: Tacikistandan olan pilot və üç amerikalı Qazaxıstan üzərində UFO müşahidə ediblər. Parlaq obyekt fırlanaraq təxminən 12,5 kilometr hündürlükdə şərqə doğru hərəkət edib. Şahidlər onu "uçuşdakı gülləyə bənzər" bir şey kimi təsvir ediblər.

Bundan əlavə, sənədlər arasında "Apollon-11" missiyasının astronavtlarının danışıqlarının şifrələri də yer alıb. Söhbət Nil Armstronq və Bazz Oldrinin Aya ilk dəfə ayaq basdığı həmin məşhur missiyadan gedir. Astronavtlar Aya gedərkən gördükləri naməlum obyekti, kabinə daxilindəki qəribə işıq parıltılarını, həmçinin Yerə qayıdarkən müşahidə etdikləri parlaq işığı təsvir ediblər - həmin vaxt ekipaj onlara lazer tutulduğunu düşünüb.

Bazz Oldrin bu barədə belə deyirdi: "Monokulyarı işıq mənbəyinə yönəltdiyimiz zaman elə görünürdü ki, sanki Günəş işığı göl kimi sakit bir su hövzəsindən əks olunur. Əgər heç kim həmin gün günorta vaxtı Ay tərəfə lazer yönəltdiyini etiraf etmirsə, deməli, bu, çox güman ki, göldən gələn əks olunma idi. Amma mən hələ də hesab edirəm ki, bu, qeyri-adi hadisədir: bu qədər böyük məsafədən belə parlaq işıq mənbəyini görmək heyrətamizdir".

Bu addım illərdir gizli saxlanılan kosmik və hava hadisələri ilə bağlı şəffaflığın təmin edilməsi istiqamətində mühüm mərhələ hesab olunur. Dərc edilən sənədlər arasında hərbi pilotların hesabatları, radar görüntüləri və müxtəlif qurumların apardığı təhqiqatların nəticələri yer alır. Sənədlərin sayının gələcəkdə daha da artacağı gözlənilir.

Milli.Az