Dünya

Başına dəhrə sancılan kişi təcili yardımda saatlarla telefonla oynadı

9 May 2026 18:00

Baxış: 1 417

VTB-də minimal faiz dərəcəsi ilə nağd kredit 9.9%-dən

#INDİA #HİNDİSTAN

Hindistanın Mumbay şəhərində xəstəxananın təcili yardım şöbəsində qeydə alınan görüntülər böyük təəccüb doğurub.

Milli.Az qafqazinfo-ya istinadən xəbər verir ki, 27 yaşlı Rohit Naqnath Pavar başına dəhrə sancılmış vəziyyətdə huşunu itirmədən telefonundan istifadə edərkən görüntülənib.

Bildirilir ki, hadisə şəhərin Mankxurd bölgəsində yerləşən qızardılmış toyuq dükanının yaxınlığında baş verib. İddiaya əsasən, Pavar aralarında əvvəlcədən düşmənçilik olan üç nəfərin hücumuna məruz qalıb.

Hücum edənlərdən birinin gəncin başının sol tərəfinə dəhrə sancdığı, digər iki nəfərin isə onu yumruq və təpiklərlə döydüyü bildirilir.

Ağır yaralanmasına baxmayaraq, huşunu itirməyən Pavar dostunun motosikleti ilə xəstəxanaya aparılıb. Sosial şəbəkələrdə yayılan görüntülərdə onun başına sancılmış dəhrə ilə xəstəxana dəhlizində gəzdiyi və telefonundan istifadə etdiyi görünür.

"Sion Hospital"ın neyrocərrahiyyə şöbəsinin rəhbəri Batuk Diyora Pavarın sağ qalmasını "möcüzə" adlandırıb.

Həkimin sözlərinə görə, dəhrə dəri, əzələ, kəllə sümüyü və beyin qişalarını keçərək, üç santimetrdən çox dərinliyə nüfuz etsə də, beynin həyati vacib hissələrinə zərər verməyib. Əməliyyatdan sonra Pavarın vəziyyətinin stabil olduğu, nitq və hərəkət funksiyalarının normal qaldığı açıqlanıb.

Hadisədən sonra ailə üzvləri xəstəxanada müalicəyə başlamazdan əvvəl uzun müddət gözlədiklərini deyərək, rəhbərliyi tənqid edib.

Polis hücumda iştirak etdiyi müəyyən edilən üç nəfərin saxlanıldığını bildirib. Hadisə Mumbayda son dövrlərdə artan bıçaqlı hücumlarla bağlı təhlükəsizlik müzakirələrini yenidən gündəmə gətirib.

Milli.Az