Cənubi Koreya 660 vətəndaşını təxliyə edir - SƏBƏB

Yaxın Şərqdə baş verən proseslər regionun təhlükəsizlik arxitekturasına ciddi təsir göstərməkdədir. Fevralın son günlərində İsrail-ABŞ-İran arasında başlanan müharibə Yaxın Şərqlə iqtisadi əlaqələri olan ölkələrdə, o cümlədən Cənubi Koreyada narahatlıq yaradıb.

Cənubi Koreya Prezidenti Li Çe Myunq həmin gün keçirdiyi brifinqdə İranda və İsraildə olan vətəndaşlarının təhlükəsizliyi ilə bağlı narahatlığını ifadə edib. O, 660-dan çox Koreya vətəndaşının Misir vasitəsilə təxliyəsi ilə bağlı göstəriş verib.

Martın əvvəlində Prezident strateji əməkdaşlığı gücləndirmək məqsədilə Sinqapur və Filippinə 4 günlük dövlət səfərinə yollanıb. Səfərdən öncə isə Yaxın Şərqlə bağlı Baş nazirə müvafiq tapşırıqlar verib. Elə həmin gün Baş nazir Kim Min Suk Nazirlər Kabinetinin iclasını keçirərək regionda olan Koreya vətəndaşlarının təhlükəsizliyi məsələsini müzakirə edib.

İclas zamanı bildirilib ki, ölkəyə idxal olunan xam neftin təxminən 70%-i, təbii qazın isə 30%-i Yaxın Şərqin payına düşür. Bu səbəbdən enerji təchizatının fasiləsiz təmin olunması üçün tədbirlər planının hazırlanmasının vacibliyi vurğulanıb. Eyni zamanda, neft qiymətləri, valyuta məzənnələri və fond bazarının daimi monitorinqi və sabitləşdirici maliyyə alətlərinin tətbiqi zəruri hesab edilib.

Prezidentin Sinqapur və Filippinə səfəri çərçivəsində süni intellekt, nüvə enerjisi və əqli mülkiyyət sahələrini əhatə edən bir sıra memorandumlar imzalanıb. O, çıxışında Yaxın Şərqdə artan gərginliyin qlobal təhlükəsizliyə və iqtisadiyyata təsirini qiymətləndirdiklərini bildirib.

Martın 4-də ölkəyə qayıdan Prezident fövqəladə kabinet iclası keçirərək vəziyyətə operativ reaksiya verib. O qeyd edib ki, qlobal qeyri-sabitliyə baxmayaraq, panikaya əsas yoxdur və bütün sahələr üzrə hazırlıq tədbirləri görülür.

Bununla belə, Yaxın Şərqdəki gərginlik artıq Cənubi Koreya iqtisadiyyatına təsir göstərib. KOSPI indeksi 12% dəyər itirib, Seulda yanacaq qiymətləri litrə görə 1800 vonu keçib, milli valyuta isə zəifləyərək 1 ABŞ dolları qarşısında 1500 von səviyyəsinə yüksəlib.

Martın 5-də Prezident 100 trilyon von (təxminən 68 milyard ABŞ dolları) həcmində bazar sabitləşdirmə proqramının icrasına göstəriş verib. Nəticədə KOSPI indeksində 9,63% artım qeydə alınıb.

Hökumət, həmçinin, böhranın uzunmüddətli olacağını nəzərə alaraq kiçik və orta sahibkarlığın ixrac imkanlarını artırmaq məqsədilə logistika dəstəyi proqramı hazırlayıb.

Enerji təhlükəsizliyi sahəsində də mühüm addımlar atılıb. Baş qərargah rəhbəri Kan Hun Sik BƏƏ-dən alternativ marşrut vasitəsilə 6 milyon bareldən çox xam neftin idxalını təsdiqləyib.

Prezident yanacaq bazarında süni qiymət artımlarına qarşı "sıfır dözümlülük" siyasəti elan edib. Aparılan nəzarət tədbirləri nəticəsində qiymətlər 1900 vondan 1845 von səviyyəsinə qədər sabitləşdirilib.

Eyni zamanda, Xarici İşlər Nazirliyi vətəndaşlara Yaxın Şərqin bir sıra ölkələrinə, eləcə də bəzi regionlara səfər etməmək barədə xəbərdarlıq edib.

Artan gərginlik fonunda Cənubi Koreyanın diqqəti tədricən hərbi təhlükəsizlik məsələlərinə yönəlib. ABŞ-ın hərbi resurslarının Yaxın Şərqdə cəmləşməsi Seulda "strateji boşluq" narahatlığı yaradıb.

Martın 12-də keçirilən Milli Təhlükəsizlik Şurasının iclasında Şimali Koreyanın mümkün təxribat ehtimalları müzakirə edilib. Prezident bildirib ki, Yaxın Şərqdəki gərginlik Koreya yarımadasında sabitlik üçün dolayı təhdid yaradır.

Bu çərçivədə Cənubi Koreya ordusu sərhəd bölgələrində döyüş hazırlığı səviyyəsini "Yüksək Həyəcan" vəziyyətinə qaldırıb.

Hazırda ölkə rəhbərliyi bir tərəfdən Yaxın Şərqdə atəşkəs təşəbbüslərini dəstəkləyir, digər tərəfdən isə enerji müstəqilliyi strategiyasını yenidən nəzərdən keçirir. Beləliklə, Yaxın Şərq artıq Cənubi Koreya üçün yalnız iqtisadi tərəfdaş deyil, həm də milli təhlükəsizliyin əsas komponentlərindən birinə çevrilib.

Fikrət Mahmudov, BDU-nun 4-cü kurs tələbəsi

Milli.Az