Dünya

Avropa İttifaqı genişlənir: Bu ölkə 28-ci üzv olmağa hazırlaşır - FOTO

14 Oktyabr 2025 22:41

Baxış: 1 752

VTB-də minimal faiz dərəcəsi ilə nağd kredit 9.9%-dən

#AVROPA İTTİFAQI

Avropa Komissiyasının sədri Ursula fon der Leyen Monteneqroya səfəri zamanı bildirib ki, ölkə üzvlük yolunda sürətlə irəliləyir və 2028-ci ildə AB-nin 28-ci rəsmi üzvü ola bilər.

Milli.Az xarici mətbuata istinadən xəbər verir ki, Tivat şəhərində keçirilən Monteneqro İnvestisiya Konfransında Monteneqronun Baş naziri Miloyko Spayiç ilə birgə mətbuat konfransı keçirən Leyen deyib:

"Siz Avropanın gələcəyinə yalnız bağlı deyilsiniz, həm də buna ürəkdən inanırsınız. Ötən səfərimdən bu yana dörd danışıqlar bölməsini bağladınız, bu il isə daha beşinin bağlanması gözlənilir. Əgər birlik içində qalsanız, 2028-ci ildə AB-yə qoşula bilərsiniz."

Leyen həmçinin Monteneqronun Aİ-nin xarici və təhlükəsizlik siyasətinə tam uyğunlaşdığını, o cümlədən Ukraynadakı təlim missiyasına Monteneqro hərbçilərinin göndərilməsi qərarını yüksək qiymətləndirdiyini qeyd edib.

Onun sözlərinə görə, sorğular Monteneqro əhalisinin 83 faizinin AB üzvlüyünü dəstəklədiyini göstərir. Leyen xüsusilə Sloveniya və Xorvatiya kimi qonşu ölkələrdən güclü dəstək olduğunu vurğulayaraq, bunun "Aİ ruhuna uyğun yaxşı qonşuluq münasibətlərinin göstəricisi" olduğunu deyib.

Baş nazir Miloyko Spayiç bildirib ki, ölkə üzvlük danışıqlarının bütün bölmələrini gələn ilin sonuna qədər bağlamağı planlaşdırır.

Beləliklə, Monteneqro Aİ-yə qəbul prosesində ən sürətli irəliləyən Balkan ölkəsi kimi göstərilir və Brüsselin dəstəyi ilə 2028-ci ildə rəsmi üzvlük real ehtimal hesab olunur.

Lalə Qüdrətova
Milli.Az