Dünya 6 dəqiqə qaranlığa qərq olacaq

Bu əsrin ən uzun Günəş tutulması həm elmi baxımdan, həm də turizm sahəsində böyük əhəmiyyət kəsb edir.

Xarici KİV-ə istinadən Milli.Az xəbər verir ki, 21-ci əsrin ən uzun tam Günəş tutulması 2027-ci il avqustun 2-də baş verəcək. Həmin gün Ayın kölgəsi İspaniyanın cənubu, Şimali Afrika və Yaxın Şərq üzərindən keçəcək. Astronomlar isə buludsuz səmada bu möhtəşəm hadisəni 6 dəqiqə 23 saniyə ərzində müşahidə edə biləcəklər.

Mütəxəssislərin sözlərinə görə, tam tutulma zamanı Günəş tacının - ulduzun xarici, çox isti atmosfer qatının öyrənilməsi mümkün olacaq. Ayın diski Günəşi tam örtərkən, tac Yerdən görünür və bu da alimlərə maqnit sahələrinin quruluşunu izləmək, plazma axınlarını tədqiq etmək və koronal kütlə atılmalarını aşkar etmək imkanı yaradır. Belə hadisələr kosmik hava şəraitinə və Yer üzündə texnologiyaların fəaliyyətinə birbaşa təsir edir.

Bu tutulma yalnız uzun davam etməsi ilə deyil, həm də müşahidə üçün əlverişli şəraitlə seçiləcək. Günəşin yüksək mövqedə olması və avqust ayında buludluluq riskinin çox aşağı olması, xüsusən də Liviya və Misirdə, elm adamlarına yüksək dəqiqlikli məlumat toplamaq şansı verəcək.

NASA da daxil olmaqla nüfuzlu elmi təşkilatlar artıq genişmiqyaslı araşdırma kampaniyaları planlaşdırır. Yerüstü rəsədxanaların quraşdırılması, kosmik cihazların kalibrlənməsi və günəş aktivliyi üzrə yeni modellərin sınaqdan keçirilməsi nəzərdə tutulur. Uzunmüddətli müşahidə mərhələsi elmi baxımdan misilsiz fürsət hesab olunur.

Eyni zamanda, bu hadisə turizm sahəsində də böyük maraq yaradıb. Dünya üzrə minlərlə həvəskar astronom artıq Luksorda yerləşən otellərdə yerlər sifariş ediblər. Xatırladaq ki, qədim misirlilər də belə nadir hadisələri izləyir və onları ilahi əlamət kimi yozurdular.

Beləliklə, 2027-ci ilin Günəş tutulması həm elm, həm də mədəniyyət baxımından əsrin ən diqqətçəkən astronomik hadisələrindən biri olacaq.

Hüseyn
Milli.Az