Dünya

Əlcəzair fransalı diplomatlara vaxt qoydu: 48 saata ölkəni tərk edin

14 Aprel 2025 13:20

Baxış: 413

VTB-də minimal faiz dərəcəsi ilə nağd kredit 10.49%-dən

#FRANSA

Əlcəzair 12 fransalı diplomatı ölkədən çıxarmaqla hədələyib və onlara 48 saat vaxt verib.

Milli.Az xəbər verir ki, bunu Fransanın xarici işlər naziri Jan-Noel Barro deyib.

"Əlcəzair hakimiyyətindən bu çıxarılma tədbirlərindən imtina etmələrini xahiş edirəm... Əgər əməkdaşlarımızın geri göndərilməsi qərarı qüvvədə qalarsa, başqa çıxış yolumuz qalmayacaq və dərhal cavab verəcəyik," - deyə Barro vurğulayıb.

AFP-yə danışan diplomatik mənbəyə görə bu 12 nəfərin arasında Fransa Daxili İşlər Nazirliyinin bəzi əməkdaşları da var.

Qeyd edək ki, cümə günü Fransa prokurorluğu Əlcəzairin tanınmış bloqeri və hökumət tənqidçisi Amir Bukorsun 2024-cü ilin aprelində Parisdə "yoxa çıxması" ilə əlaqədar üç Əlcəzair vətəndaşını, o cümlədən bir konsulluq əməkdaşını rəsmi olaraq ittiham edib.

Bu ittiham Əlcəzair ilə Fransa arasındakı münasibətlərin həssas dövrünə təsadüf edir. Əlcəzair hakimiyyəti bu addımın son vaxtlar əlaqələrin düzəldilməsi cəhdlərini pozmaq məqsədi daşıdığını iddia edib.

"Amir DZ" adı ilə tanınan Bukors Əlcəzair hökumətinə qarşı çıxan məşhur sosial media fenomenidir və TikTok-da bir milyondan çox izləyicisi var.

O, 2016-cı ildən Fransada yaşayır və 2023-cü ildə ona siyasi sığınacaq verilib. Hüquqşünasının sözlərinə görə, o, 2024-cü ilin aprelində oğurlanıb və ertəsi gün sərbəst buraxılıb.

Əlcəzair isə onun mühakimə olunması üçün ölkəyə qaytarılmasını tələb edir. Bukors barəsində dələduzluq və terror ittihamları ilə bağlı doqquz beynəlxalq həbs qərarı çıxarılıb.

Milli.Az