Dünya

Qafqazda qurulan oyun

18 May 2024 14:47
Baxış: 821
VTB-də MİNİMAL FAİZ DƏRƏCƏSİ İLƏ NAĞD KREDİT 10.49%-dən

Son dövrlər Cənubi Qafqaz ölkələri üzərindən ciddi siyasi oyunlar qurulmağa çalışılır. Bütün tarixi dövrlərdə böyük güclərin marağında olan region hər zaman bunun fəsadlarını yaşayıb. Heç bir qüvvə Qafqazda sülh olmasının tərafdarı olmayıb və bu məqsədə müxtəlif alətlərlə çatmağa çalışıb. Beynəlxalq qüvvələrin bu siyasətindən isə hər zaman yerli əhali əziyyət çəkib.

Azərbaycanın Qarabağ məsələsini cəmi 44 gün ərzində həll etməsi isə Cənubi Qafqazda yeni reallıqlar yaratdı. Region üçün birdən-birə yaranan sülh, iqtisadi inkişaf imkanları bir sıra dairələrin planlarını əsaslı şəkildə pozdu. Pozulmuş planların nəticəsi olaraq həmin qüvvələr təcili yeni planlar qurmağa, yeni alətlər axtarmağa başladılar.

Region ölkələri içərisində yeganə siyasi, iqtisadi sabitlik olan ölkə Azərbaycandır. Həm Gürcüstanda, həm də Ermənistanda hazırda ciddi hakimiyyət davaları aparılır. Dövlətin dayaqları ciddi şəkildə sarsıdılmağa çalışılır. Hər iki ölkədə böyük güclərin maraqlarının toqquşması sanki "şişmək" effekti verir. Etirazlar, toqquşmalar bu qəbildəndir.

Görünən odur ki, region dövlətlərini bir-birinə düşmən etmək siyasəti hazırda tam da effektiv deyil, əvəzində daxili münaqişələr yaradılmağa çalışılır.

Baş verənlər fonunda Azərbaycanın yürütdüyü siyasət peşəkar və dəqiq hesablanıb. Azərbaycan bu gün region üçün balanslaşdırıcı rol oynayır və regiondakı sabitliyin yaradıcısı da məhz Azərbaycandır. Bu gün regionda proseslər Azərbaycanın müəyyən etdiyi gündəliyə uyğun baş verir.

Azərbaycan öz qətiyyətli mövqeyindən geri çəkilmir və çəkilməyəcək. Kənar qüvvələr regionda proseslərə müdaxilə etməyə, öz maraqlarını təmin etməyə cəhd göstərsələr də, Azərbaycanın prinsipal mövqeyi nəticəsində bütün bu cəhdlər iflasa uğrayır. Məhz bu səbəbdən də həmin qüvvələr ölkələrin daxili işlərinə müdaxilə edərək, vəziyyəti gərginləşdirməyə çalışırlar.

Lakin bütün tərəflər anlamalıdır ki, regionun aparıcı qüvvəsi Azərbaycandır və regional bütün məsələlərdə Azərbaycanla hesablaşmalıdırlar.

Gürcüstan və Ermənistan isə siyasi müstəqillik üçün bu proseslərdən minimum ziyanla çıxmağı bacaracaqlarmı? Bu məsələ ciddi sual altındadır. Çünki hər iki ölkə üçün əsas xarakterik cəhətlərdən biri iqtisadi müstəqilliyinin olmaması və asılılıqdır. Məhz bu amil də müstəqil siyasətin qurulmasına imkan vermir.

Ümumilikdə, baş verən siyasi proseslərdən region əhalisinin çıxarmalı olduğu bir nəticə var. Heç bir halda hansısa qüvvələrdən asılılıq rifah vəd etmir. Həmin qüvvələr ilk fürsətdə, maraqları dəyişdikdə qurban verməyi də bacarırlar.

Günümüz reallığında Ukrayna buna ən "ideal" nümunədir. Hazırkı dönəmdə Ukraynanı Rusiya qarşısına çıxaran Qərb faktiki olaraq onu döyüş meydanında tək buraxmaq üzrədir.

TREND

Azernews Newspaper

XƏBƏR LENTİ

Copyright © 2024 Milli.Az

Saytdakı materialların istifadəsi zamanı istinad edilməsi vacibdir. Məlumat
internet səhifələrində istifadə edildikdə hiperlink vasitəsi ilə istinad mütləqdir.