İsveçrə öz istehsalı olan silahların Ukraynaya göndərilməsinə veto qoyub

İsveçrə hökuməti Danimarka tərəfindən Ukraynaya İsveçrə istehsalı olan zirehli maşınların tədarükünü əngəlləyib.

Milli.Az UNİAN-a istinadən bildirir ki, bu barədə İsveçrənin SRF telekanalı məlumat yayıb.

Danimarka hökuməti Ukraynaya 20-yə yaxın "Piranha III" döyüş maşını keçirmək istəyir. Danimarka səlahiyyətliləri icazə üçün İsveçrənin İqtisadi Məsələlər üzrə Seco Dövlət Katibliyinə rəsmi müraciət etdi. Və bu müraciət rədd edildi. Seco bir neçə gün əvvəl sorğunu rədd etdi.

Bernin icazəsi olmadan Ukraynaya yardım mümkün deyil: Danimarka nəqliyyat vasitələri alarkən hərbi texnikanı yalnız İsveçrənin icazəsi ilə üçüncü tərəfə təhvil verməyi öhdəsinə götürüb.

Aprelin əvvəlində Seco Almaniyadan "Gepard" qurğuları üçün sursatları Ukraynaya ötürməkdən imtina etmişdi. Seco "yox"unu neytrallıq və Müharibə Materialları Aktı ilə əsaslandırır. O, müharibə edən ölkələrə silah ixracını qadağan edir.

Bununla belə, İsveçrənin xaricdən gələn təzyiqlər qarşısında öz mövqeyinə sadiq qalıb-qalmayacağı bilinmir. Ötən həftə Almaniyanın vitse-kansleri Robert Qabek Ukraynaya "maksimum dəstək" istədiyi barədə deyib.

Fevralın 24-dən əvvəl Almaniya da müharibə edən ölkələrə silah ixracını istisna edirdi. Robert Qabek səhvini etiraf etdi: "Biz reallığa öz münasibətimizi yenidən qiymətləndirməliyik".

İsveçrə Federal Şurasının bu və ya gələn cümə günü məsələ ilə bağlı qərar verəcəyi gözlənilir. Federal administrasiyada və parlamentdə müharibə materialları qanununda hərəkətə keçmək üçün yer görən insanlar var: İsveçrə müəyyən şərtlər altında Avropa dövlətlərinə İsveçrə silahlarını ötürməyə icazə verə bilər.

"Federal Şura indi hərəkətə keçməli və praktikasını düzəltməlidir. Bu silahlar təcavüzkardan özünü müdafiə edən bir ölkəyə verilə bilər", - İsveçrə Dövlət Şurasının üzvü Pirmin Bişof ümidlidir.

Xatırladaq ki, İsveçrə rəqəmsal xidmətlərin inkişafı üçün Ukraynaya maliyyə köçürüb.

Aslan Məmmədov
Milli.Az