İdman

Azərbaycanın idman tarixində daha bir ilk - Polo üzrə Avropa çempionatının finalındayıq - FOTO

28 Sentyabr 2018 18:10

0 Şərh Baxış: 1 488

VTB-də minimal faiz dərəcəsi ilə nağd kredit 9.9%-dən

#İDMAN #İTALİYA #AZƏRBAYCAN #POLO

Azərbaycan millisinin polo üzrə Avropa çempionatında zəfər yürüşü davam edir. Son baryer ev sahibi - İtaliya olacaq.

İtaliyanın Siyene şəhərində davam edən Polo üzrə Avropa çempionatında bu gün 4-cü turun oyunları keçirilib.

Milli.Az xəbər verir ki, çempionatın 4-cü turunda "A" qrupunun liderləri - Azərbaycan və İrlandiya milliləri görüşüblər. Bu qarşılaşmaya qədər hər iki komanda 3 qələbə qazanaraq turnir cədvəlinin 1-ci və 2-ci pillələrini bölüşürdülər.

Hazırki Avropa çempionu olan İrlandiya komandası ilə gərgin mübarizə şəraitində keçən görüş bütün azarkeşlərə həyəcan dolu dəqiqələr yaşadıb. Güclü iradə və yüksək peşəkarlıq nümayiş etdirən idmançılarımız rəqiblərini 5:3,5 hesabı ilə məğlub edərək Azərbaycan atçılıq idmanı tarixində ilk dəfə olaraq Avropa çempionatının finalına yüksəliblər.

Mübarizəni Avropa birinciliyinin bürünc medalları uğrunda davam etdirmək məcburiyyətində qalan İrlandiya yığması ilə qarşılaşmada idmançılarımızdan Elçin Camallı və Fabian Bolanterio xüsusilə fərqləniblər.

Xatırladaq ki, atçılıq idmanı tariximizə yeni səhifə yazan millimiz Avropa çempionatının əvvəlki turlarında Niderland komandasını 7:3, Fransa millisini 8:4, Slovakiya yığmasını isə 11:7 hesabı ilə məğlub edib.

Sabah çempionatın "B" qrupunun oyunları keçiriləcəkdir. Avstriya ilə Almaniya, İtaliya ilə İsveçrə komandaları qarşılaşacaqlar. Lakin bu oyunların nəticələrindən asılı olmayaraq İtaliya komandası artıq finalda, Almaniya komandası isə 3-cü yer uğrunda görüşdə iştirak etmək hüququ qazanıblar.

Polo üzrə Avropa Çempionatının 30 sentyabr tarixində keçiriləcək final oyununda Azərbaycan və İtaliya komandaları, 3-cü yer uğrunda oyunda isə İrlandiya və Almaniya yığmaları qarşılaşacaqlar.

Zəfər Tağı
Milli.Az