Şok etiraflar: "Baş məşqçi "Neftçi"yə uduzmağımızı xahiş etdi" - YENİLƏNİB - VİDEO

12:55

Tovuzun "Turan" klubunun 2009-cu il dekabrın 5-də Azərbaycan çempionatında "Neftçi"yə qarşı görüşdə bilərəkdən məğlub olması ölkə mediasının gündəmini zəbt etməkdə davam edir.

"Turan"ın sabiq futbolçusu Valeri Onile öz ölkəsinin mətbuatına açıqlamasında sözügedən klubun baş məşqçisi Nizami Sadıqov haqqında şok faktlar üzə çıxardı. Onile Sadıqovun bilərəkdən "Turan"ı "Neftçi"yə uduzdurmasını bildirdi.

Milli.Az-a açıqlama verən təcrübəli baş məşqçi Nizami Sadıqov bildirdi ki, bunlar cəfəngiyyatdır: "Xırda şeyi böyüdüb fil edirlər. Bu deyilənlər ağ yalandır. Səhərdən telefonum susmur. Mən bunu etmərəm və icazə də vermərəm belə şey olsun".

---------
12:25

Tovuzun "Turan" klubunun sabiq futbolçusu Valeri Onile Moldova mətbuatına müsahibəsində 2009-cu il dekabrın 5-də Azərbaycan çempionatında "Neftçi"yə qarşı görüşdə bilərəkdən məğlub olduqlarını etiraf edib. Milli.Az sportpress.az-a istinadən onun müsahibəsindən şok etirafları təqdim edir:

"Tovuzda oynadığımız zaman "Neftçi"nin sabiq çalışdırıcısı bizdə baş məşqçi idi. Təsəvvür edin, onun çempionluğa oynayan keçmiş komandası Tovuzda qonağımızdır. Bizə heç kim əvvəlcədən oyunu verməli olduğumuzu demədi. Amma start heyət şübhəli idi. Çünki ilk dəqiqələrdən əvəzedicilərin futbolçularını, daim ehtiyatda qalanları meydana buraxdılar. İlk hissədən sonra hesab 2-0 bizim xeyrimizə idi. Soyunub-geyinmə otağında baş məşqçimiz dedi ki, ona kömək edək. O, bizdən "Neftçi"yə uduzmağı xahiş etdi. Belə də dedi: "Kömək edin, bu gün uduzmaq lazımdır. Amma mükafat da olmayacaq". Nəticədə biz 2-3 hesabıyla uduzduq. Təcrübəli futbolçular meydana çıxmaqdan imtina etdilər. Onlar bu "şou"da iştirak etmək istəmədiklərini məşqçiylə mübahisə etməklə bildirdilər".

Qeyd edək ki, 2009-cu ilin dekabrın 5-də Tovuzda keçirilən "Turan"-"Neftçi" görüşündə meydan sahiblərinin baş məşqçisi Nizami Sadıxov idi. Həmin oyunda "Turan" 2-0 hesabıyla öndə olsa da, sonra 3-2 hesabıyla şübhəli məğlubiyyətə uğrayıb.

Niyaməddin Şirinov
Milli.Az

-----------
14:06

Videonu izləmək üçün şəklə klikləyin.