Azərbaycan klubunda irlandiyalı idmançı

Azərbaycanın ilk velosiped komandası "Synergy Baku" heyətini daha bir idmançı ilə gücləndirib. Bu haqda apasport.az saytına Velosiped İdmanı Federasiyasının mətbuat xidmətinin rəhbəri Pərviz Musayev məlumat verib.

O bildirib ki, 28 yaşlı irlandiyalı Metyu Bremiye 2014-cü ildə keçiriləcək beynəlxalq yarışlarda komandamızın şərəfini qoruyacaq. 5 dəfə İrlandiya çempionu adını qazanmış Mrtyu "Synergy Baku"nun gələn mövsüm üçün sifariş etdiyi sayca 16-cı velosipedçidir.

Peşəkar karyerasına 2006-cı ildə "DFL-Cyclingnews-LItespeed" komandasında başlayan Bremiye, növbəti 2 ildə "Profel Ziegler Continental Team", 2009-2010-cu illərdə isə "Post-Sean Kelly" komandasında çıxış edib. Metyu Bremiye 2011-ci ildə tanınmış "HTC-Highroad" komandasında, 2012-2013-cü illərdə isə daha bir məşhur klub "Omega Pharma-QuickStep"də çıxışları ilə tanınıb. Yeri gəlmişkən, o, 2013-cü ildə öz komandasında çempion sistemində mübarizə aparıb.

"Synergy Baku"nun baş meneceri David McQuaid komandanın yeni üzvü haqda yüksək fikirdədir: "Metyunun bizə qoşulmasından çox məmnunuq. Çünki o, əvvəlki komandalarında topladığı təcrübəni bizə gətirib və bunun bizə böyük xeyri dəyəcək. Üstəlik, Metyunun daha öncə çempion sistemində mübarizə aparması da bizim imkanlarımızı xeyli artırır. O, əsl bizə lazım olan velosipedçidir."

"2013-cü ildə çempion sistemində mübarizə aparmağım mənə çox şey öyrətdi və peşəkarlığımı xeylı artırmağa kömək etdi", - deyən Metyu Bremiye "Synergy Baku"ya keçidində həlledici amilin David McQuaidla dostluq münasibətlərinin olmasını bildirib: "Mənim komandanın digər üzvləri Connor McConvey və David McCann, eləcə də idman direktoru Jeremy Huntla da gözəl münasibətlərim var. Belə bir komanda ilə işləyəcəyimdən çox məmnunam və sevinirəm ki, yeni insanlarla tanış olacağam".

"Synergy Baku"nun heyətində çıxış edəcəyi dövrdə Metyu Bremiyenin əsas hədəfi iştirak edəcəyi mərhələ yarışlarında ümumi klassifikasiyada qalib olmaqdır: "Şübhəsiz ki, mənim əsas məqsədlərimdən biri də öz milli titulumu saxlamaq olacaq. Amma, heyətində çıxış edəcəyim kollektivlə də bağlı hədəflərim böyükdür və komandama faydalı olmağa çalışacam. Bilik və bacarığımı komandadakı gənc velosipedçilərə öyrətməklə bir-birimizə sıx bağlı olan bir kollektiv formalaşdırmaq əsas istəyimdir. İnkişaf etməkdə olan Azərbaycan velosipedində mənə verilən bu şansı yüksək qiymətləndirirəm".

Qeyd edək ki, Metyu Bremiyenin gəlişi ilə "Synergy Baku"nun heyətindəki velosipedçilərin sayı 17-yə çatıb. Amma Beynəlxalq Velosipedçilər İttifaqının (UCİ) qaydalarına görə, bir komanda kontinental səviyyəli yarışlarda 8-16 nəfərlə çıxış edə bilər. "Synergy Baku"nun baş meneceri David McQuaidın sözlərinə görə, say çoxluğu komandamızın digər üzvlərinin başqa profillər üzrə yarışlarda təmsil olunmasına imkan verəcək.

Milli.Az