Ermənini diz çökdürən azərbaycanlı Milli.Az-a danışdı - FOTO

- Ağəli bəy, bu döyüşə necə hazırlaşmışdınız?

- Bu döyüş beynəlxalq reytinq döyüşü idi. Rəqibim əslən erməni olan Gürcüstan vətəndaşı Ruben Movsesyan idi. Həmişə olduğu kimi bu dəfə də döyüşə ciddi şəkildə hazırlaşmışdım. Bundan əlavə, minlərlə gəncin dəstəyi mənə inam verirdi. Rəqibim təcrübəli boksçu idi. Dəfələrlə beynəlxalq yarışmaların qalibi olub və iki dəfə Gürcüstan çempionu adını qazanıb. Yarışlarının çoxunu Avropada çox təcrübəli boksçulara qarşı keçirib. Ancaq buna baxmayaraq, mən də yarışa çox gözəl hazırlaşmışdım və qalib gələcəyimə heç şübhəm yox idi. Bir də ki, bu qədər gəncin dəstəyi ilə necə uduzmaq olar e... (gülür).  Bu dəstək mənə çox güc verdi. Döyüş 6 raunddan ibarət idi, bütün raundları döyüşdük, hər raundda üstünlük məndə idi, hətta iki dəfə rəqibim nokauta düşdü.

- Erməni boksçu üzərində qələbəni şərh etməyi rica edərdim sizdən.

- Mən həmişə rinqə qalib gəlmək üçün çıxıram, yəni milliyyətindən asılı olmayaraq rinqdə çalışmaq lazımdır ki, maksimum şəkildə qalib gələsən. Ancaq bu döyüşdə rəqibim erməni olduğu üçün öz üzərimdə çox böyük məsulliyət hiss edirdim. Çünki bunlar üzbəüz heç bir zaman döyüşmürlər. Burada isə mənimlə açıq döyüşdə idi. Yüzlərlə gəncimizin mənə olan inamını doğrultmaq, onların mənə olan inamını sındırmamaq lazım idi və hər şeydən öncə vətənimin adını ucaltmaq, millətimizə layiqli oğul kimi ayaq üstə qalmaq və irəli getmək lazım idi.  Allahın bu gününə şükürlər olsun ki, bu döyüşdə qalib gəldim və vətənimizin adını yüksəltmək mənə qismət oldu. Mən həmişə fəxr etmişəm, bu gün də fəxr edirəm ki, mən azərbaycanlıyam.

- Növbəti döyüşünüz nə vaxt olacaq? Rəqibiniz kim olacaq? Tanışdırmı rəqib?

- Növbəti  döyüşüm, inşallah, əgər hər şey yaxşı olsa, yəni zədə almasam və məşq proseslərim yaxşı keçsə, bu ilin iyul ayında planlaşdırılır. Rəqibimin kim olduğundan hələlik xəbərim yoxdur. Yəgin ki, bu dəfə də hansısa bir güclü boksçu ilə vuruşaram, çünki mən çempion olmaq üçün asan yol axtarmıram.

- Siz Ukraynada məşq edirsiz, yoxsa yarışa görə ora getmisiz?

- Bəli, mən Ukraynada məşq edirəm və bütün məşq proseslərim hamısı Ukraynada keçir.

- Ağəli bəy, bir peşəkar idmançı kimi cavabınız maraqlıdır. Erməni üzərində qələbə digər idmançılar üzərindəki qələbədən nə ilə fərqlənir?

- Bunu anlatmaq çox çətindir, gərək yaşayasan. Həm də bu, erməni üzərində mənim 3-cü qələbəmdir.

- Erməni idmançı sizinlə döyüş zamanı gözlərinizdə nə görürdü?

- Xalqın gücünü, mənə olan inamlarını doğruldacağımı!

- Ağəli bəy, erməni idmançıya rinqdə qalib gəldiz, səngərdə necə, belə zəfərə hazırsız?

- Hər zaman demişəm, indi də deyirəm: bir canım varsa, o da Azərbaycana fəda olsun!  Ali baş komandanın əmrini gözləyirəm. Yaşasın Azərbaycan! Yaşasın millətimiz. Yeri gəlmişkən, deyim ki, vətənin mərd oğullarının dəstəyi ilə mən bu nailiyyətləri qazanıram. Mənə maddi və mənəvi dəstək olan bütün insanlara öz böyük minnətdarlığımı bildirirəm. Çalışacam ki, əlimdən gələn qədər güclü məşqlər edim ki, mənə olan inamlarınızı doğruldum və üçrəngli bayrağımızı bütün idman arenalarında və idmandan kənarda yüksək tutum.

- Gənc boksçularımıza nə məsləhət görərdiz?

- Gənc boksçularımıza məsləhətim budur ki, əgər bu idmanı seçmisinizsə, bu yolda getmək istəyirsinizsə, çempion olmaq və böyük uğurlar qazanmaq istəyirsinizsə, tutduğunuz işi sevin. O zaman hər şey gözel olacaq!

Tuncay Türbəndəzadə
Milli.Az