İdman

Britaniya baş nazirindən İnfantinoya sərt etiraz: Avropa da FIFA-ya qarşı təcili iclas keçirəcək

29 İyul 2026 09:56

Baxış: 289

VTB-də minimal faiz dərəcəsi ilə nağd kredit 9.9%-dən

#MARAQLI #FUTBOL #BRİTANİYA #UEFA

Futbol üzrə dünya çempionatının kommersiya hüquqlarının bir hissəsinin özəl investorlara satılması ilə bağlı planlar beynəlxalq futbol ictimaiyyətində narazılıq yaradıb.

Milli.Az xəbər verir ki, jurnalist Rob Harrisin yaydığı məlumata görə, bir sıra Avropa ölkələri bu təşəbbüsə etiraz olaraq dünya çempionatını boykot etmək variantını müzakirə edir.

Bildirilir ki, yaranmış vəziyyətlə əlaqədar UEFA-ya üzv milli assosiasiyaların nümayəndələri bu həftə təcili toplantı keçirərək məsələni müzakirə edəcəklər.

Daha əvvəl The Times nəşri FIFA prezidenti Canni İnfantinonun dünya çempionatının kommersiya hüquqlarının bir hissəsinin idarə olunması üçün yeni şirkət yaratmağı planlaşdırdığını yazmışdı. Məlumata görə, həmin şirkət kişilər və qadınlar arasında keçirilən dünya çempionatları, eləcə də klublararası dünya çempionatının kommersiya hüquqlarını idarə edəcək.

İddialara əsasən, layihə ilə bağlı ABŞ Prezidenti Donald Tramp administrasiyasına yaxın şəxslərlə də məsləhətləşmələr aparılıb. Plan reallaşacağı təqdirdə, FIFA-ya üzv olan 211 milli assosiasiyanın hər birinin təxminən 20 milyon ABŞ dolları dəyərində pay əldə edə biləcəyi bildirilir. Həmçinin Canni İnfantinonun yeni yaradılacaq şirkətdə komissar vəzifəsini tutacağı da iddia olunur.

Məsələyə münasibət bildirən Böyük Britaniyanın Baş naziri Endi Börnhem isə dünya çempionatının kommersiya obyektinə çevrilməsinin yolverilməz olduğunu vurğulayıb.

"Futbol investorlara deyil, tribunaları dolduran azarkeşlərə məxsusdur. Dünya çempionatı satıla biləcək məhsul deyil. Oyunun hətta kiçik bir hissəsinin satılması onun mahiyyətinə xəyanətdir", - deyə Endi Börnhem bildirib.

Qeyd edək ki, UEFA da sözügedən təşəbbüsü tənqid edən rəsmi bəyanatla çıxış edib.

Müəllif: Tural Hüseyn (Milli.Az redaktor)