İdman

"Turan Tovuz" Konfrans Liqasından KƏNARLAŞDIRILDI: CAS-a şikayət ediləcək

3 İyun 2026 09:57

Baxış: 482

VTB-də minimal faiz dərəcəsi ilə nağd kredit 9.9%-dən

#AZƏRBAYCAN FUTBOLU #FUTBOL #UEFA #TOVUZ

Turan Tovuz UEFA-nın klubla bağlı qəbul etdiyi qərardan sonra rəsmi açıqlama yayıb.

Milli.Az-ın məlumatına görə, klub bəyan edib ki, 2025/2026 mövsümünü Premyer Liqada üçüncü pillədə başa vuraraq idman prinsiplərinə uyğun şəkildə UEFA Konfrans Liqasına vəsiqə qazanıb. Lakin UEFA İntizam Komitəsinin apardığı araşdırmadan sonra komandanın 2026/2027 mövsümündə Avropa turnirlərində iştirakına icazə verilməyib.

Məlumata görə, qərarın qəbul edilməsində AFFA İntizam Komitəsinin 13 dekabr 2019-cu il tarixli qərarı əsas götürülüb. Həmin qərarla o dövrdə I Divizionda çıxış edən komandanın yeddi futbolçusu futbolla bağlı bütün fəaliyyət növlərindən uzaqlaşdırılmışdı.

"Turan Tovuz" rəhbərliyi qərarla razılaşmadığını bildirərək hüquqlarını müdafiə etmək üçün bütün hüquqi imkanlardan istifadə edəcəyini açıqlayıb. Klubun məlumatına əsasən, məsələ ilə bağlı yaxın günlərdə İdman Arbitraj Məhkəməsinə (CAS) müraciət ediləcək və qərarın yenidən nəzərdən keçirilməsi tələb olunacaq.

Klub həmçinin vurğulayıb ki, UEFA-nın qərarına baxmayaraq, Avrokuboklara hazırlıq planlarında hər hansı dəyişiklik nəzərdə tutulmur. Komandanın bu ay bir araya gələcəyi və hazırlıq prosesinin davamı üçün Türkiyədə təlim-məşq toplanışına yollanacağı bildirilib.

"Turan Tovuz"un açıqlaması futbol ictimaiyyətində geniş müzakirələrə səbəb olub. Azarkeşlər və idman mütəxəssisləri klubun CAS-a müraciətinin nəticələrini maraqla gözləyirlər.

Hüseyn
Milli.Az