İdman

Levandovski: "Məni ən çox o danlayıb"

9 Yanvar 2026 13:31

Baxış: 2 245

VTB-də minimal faiz dərəcəsi ilə nağd kredit 9.9%-dən

#MARAQLI #BARSELONA #FUTBOL

"Barselona"nın hücumçusu, daha əvvəl Dortmund "Borussiya"sı və "Bavariya" forması geyinmiş Robert Levandovski məşhur alman mütəxəssis Yurgen Kloppun futbolçu karyerasındakı əhəmiyyətli rolundan danışıb.

Milli.Az-ın xarici mediaya istinadən verdiyi məlumata görə, polşalı forvard bildirib ki, çalışdığı bütün baş məşqçilər ona müəyyən bilik və təcrübə qazandırıb:

"Kloppdan başlayaraq Qvardiola, Ançelotti, Haynkes, Naqelsmann və Flikə qədər bütün məşqçilərimdən nəsə öyrənmişəm. Həm 'Bavariya'da, həm də 'Barselona'da. Mən öyrənməyə açıq futbolçuyam".

Levandovski xüsusilə Kloppun ona düzgün düşüncə tərzi formalaşdırdığını vurğulayıb:

"Məni ən çox tənqid edən, eyni zamanda ən çox inkişaf etdirən məşqçi Klopp olub. O, mənə həm sərt yanaşırdı, həm də çox şey öyrədirdi".

Hücumçu Dortmunddakı ilk illərini də xatırlayıb:

"Dortmunda gələndə hər şeyi bacardığımı sübut etmək istəyirdim. Amma bir müddət sonra onun məndən nə gözlədiyini tam anlamadığımı hiss etdim və birbaşa yanına gedib soruşdum. Aramızda elə bir söhbət oldu ki, bu, həyatımı dəyişdi. Onun mənə inandığını gözlərindən görürdüm. Bu, atamın vəfatından sonra yaşadığım ən təsirli söhbətlərdən biri idi".

Levandovski həmin dialoqun karyerasında dönüş nöqtəsi olduğunu qeyd edib.

Hüseyn
Milli.Az