Cəmiyyət

Azərbaycanda ağaclar üçün yeni məlhəm hazırlanıb - FOTO

30 Oktyabr 2020 18:00
Baxış: 1 340
VTB-də MİNİMAL FAİZ DƏRƏCƏSİ İLƏ NAĞD KREDİT 10.49%-dən

AMEA Yüksək Texnologiyalar Parkının rezidenti tərəfindən ağac budaması zamanı tətbiq olunan effektiv məlhəm hazırlanıb.

Yüksək Texnologiyalar Parkından Milli.Az-a verilən məlumata görə, son zamanlar qlobal istiləşmə ilə əlaqədar ağacların budama yerlərində çürümə prosesinə bağlı xəstəliklərə daha çox rast gəlinir. İsti havalarda ərimə temperaturu yüksək olduğu üçün budama zamanı istifadə olunan qoruyucu laydan ibarət məlhəmlərin effektivliyi azalır. Yüngül zədələrdən fərqli olaraq, dərin və irimiqyaslı zədələr zamanı əlavə qoruyucu vasitələrdən istifadə olunmasına ehtiyac yaranır.

Bu problemlə əlaqədar bir neçə il bundan öncə Azərbaycan Respublikası Kənd Təsərrüfatı Nazirliyinin Quba rayonunda yerləşən Meyvəçilik və Çayçılıq Elmi-Tədqiqat İnstitutu tərəfindən isti hava şəraitinə daha dayanıqlı məlhəmin hazırlanması üçün AMEA Yüksək Texnologiyalar Parkının rezidenti olan Təcrübə-Sənaye Zavoduna müraciət olunmuşdur. Bu məqsədlə Zavodun Elmi-tədqiqat sınaq laboratoriyası tərəfindən bir neçə nümunə hazırlanaraq instituta göndərilmiş, bu nümunələrdən biri yüksək effektivlik nümayiş etdirmişdir. Belə ki, Meyvəçilik və Çayçılıq Elmi-Tədqiqat İnstitutuna təqdim olunan təcrübə nümunələri 1 hektar ərazidə sınaqdan keçirilmiş və müsbət nəticələr əldə olunmuşdur.

Hazırda Təcrübə-Sənaye Zavodunda "Bağ məlhəmi" adlı həmin məhsulun kütləvi istehsalına başlanılıb. Bu preparat meyvə ağaclarında budamadan sonra yaranan yaralarda göbələk, bakteriya, virus mənşəli xəstəliklər, həmçinin zərərvericilərin məskunlaşmasının qarşısının alınması məqsədilə istehsal olunub.

Tam yerli xammal bazası əsasında hazırlanmış "Bağ məlhəmi"nin Azərbaycanın müxtəlif bölgələrində üzümlüklərdə, meyvə bağlarında ağac budamasından sonra onun zədələnmiş hissələrdəki kəsiklərin üzərində tətbiq olunması ağacların sağlam qalması və vaxtından əvvəl qurumaması baxımından böyük səmərə verəcək.

Milli.Az

Məqaləyə dair fotomateriallar:

Azernews Newspaper

XƏBƏR LENTİ

Copyright © 2024 Milli.Az

Saytdakı materialların istifadəsi zamanı istinad edilməsi vacibdir. Məlumat
internet səhifələrində istifadə edildikdə hiperlink vasitəsi ilə istinad mütləqdir.