Ombudsman “Diffamasiya haqqında” qanun layihəsinin qəbulunun tərəfdarıdır

"Şərəf, ləyaqət və işgüzar nüfuzun qorunması, o cümlədən, fikir və söz azadlığına hörmət və eləcə də, sağlam və əsaslı tənqidə münasib şəraitin yaradılması demokratik dəyərləri özündə cəm edən hər bir dövlətin ümdə vəzifələrindən sayılır". Ombudsman bunu Milli Məclisin bu gün keçirilən iclasında 2009-cu ilin yekunları ilə bağlı hesabatında deyib.

Ədalət Partiyasının sədri, millət vəkili İlyas İsmayılov bilıdirib ki, insanın ləyaqəti hər şeydən üstündür və bu səbəbdən "Diffamasiya haqqında" qanunun qəbulu hazırkı şəraitdə yolverilməzdir. Onun fikrincə, bu qanunun qəbulu Azərbaycanda mətbuatla cəmiyyət arasında daha ciddi qarşıdurmanın yaranması ilə nəticələnə bilər.

"Bu qanun Avropanın bir sıra ölkələrində qəbul olunmadığı halda, biz niyə layihəni müzakirəyə çıxarmalıyıq?" Bunu isə Milli Məclis sədrinin birinci müavini Ziyafət Əsgərov deyib. O bildirib ki, bu qanunu, ilk növbədə, həmin Avropa dövlətləri qəbul etdikdən sonra, layihənin müzakirəyə çıxarılması Azərbaycan hökuməti qarşısında şərt kimi irəli sürülə bilər: "Azərbaycandan bu qanunu tələb edənlər ölkəmizdə xaos yaradılmasında maraqlıdırlar".
 
Qeyd edək ki, "Diffamasiya haqqında" qanun layihəsi 2005-ci ildə ATƏT-in Bakı ofisinin dəstəyi ilə hazırlanıb. Onu hazırlayan işçi qrupa millət vəkillləri Qənirə Paşayeva, Azay Quliyev, jurnalist təşkilatlarının nümayəndələri, hüquqşünaslar daxildir. Beynəlxalq təşkilatlar hesab edirlər ki, təhqirə və böhtana görə cinayət məsuliyyəti nəzərdə tutulan 147-ci (böhtan) və 148-ci (təhqir) maddələri Cinayət Məcəlləsindən çıxarılmalıdır.

"Diffamasiya haqqında" qanun layihəsinin qəbulu ilə bağlı 2009-cu ilin mayında 6 jurnalist təşkilatı - Azərbaycan Jurnalistlər Birliyi, Nəcəf Nəcəfov Fondu, Jurnalistika və İnkişaf Mərkəzi, "Yeni Nəsil" Jurnalistlər Birliyi, Azərbaycan Media Mərkəzi və Demokratik Jurnalistlər Liqası Parlamentə müraciət etmişdi. Sonradan həmin müraciətə 400-ə yaxın KİV nümayəndəsi, jurnalist təşkilatlarının üzvləri də qoşulub. Qanun layihəsi ATƏT-in ekspertizasından keçirilib.

/Trend/