Sürücülük hüququ məhdudlaşdırılan şəxslər vəsiqəsini geri qaytararkən pul ödəməlidirmi?

Sürücülük hüququ məhdudlaşdırılanlar üçün sevindirici qərar, nəhayət ki, verildi. Milli.Az xəbər portalının məlumatına görə, Azərbaycan hökuməti "Nəqliyyat vasitəsini idarə etmək hüququ verən sürücülük vəsiqəsi almaq istəyən şəxslərdən imtahanların qəbul edilməsi və onlara sürücülük vəsiqəsinin verilməsi qaydaları haqqında Əsasnamə"yə dəyişiklik edib.

Əsasnaməyə edilən dəyişikliyə görə, nəqliyyat vasitəsini idarəetmə hüququ bir ildən çox müddətə məhdudlaşdırılmış şəxslərə sürücülük vəsiqəsi nəqliyyat vasitəsini idarəetmə vərdişləri üzrə təcrübi imtahanı müvəffəqiyyətlə verdiyi gün qaytarılır.

Nəqliyyat vasitəsini idarəetmə hüququ bir il və daha az müddətə məhdudlaşdırılmış şəxslərə isə sürücülük vəsiqəsi imtahansız, həmin müddət bitdiyi gün qaytarılır.

Daxili İşlər Nazirliyinin Baş Dövlət Yol Polis İdarəsinin ictimaiyyətlə əlaqələr şöbəsinin rəisi Kamran Əliyev Milli.Az xəbər portalına açıqlamasında bildirdi ki, Azərbaycan Parlamenti İnzibati Xətalar Məcəlləsinə (İXM) 456.3-cü maddə əlavə olunması barədə qərar qəbul edib.

Onun sözlərinə görə, qanunvericilikdə müvafiq dəyişiklik olub, İXM-nin 456-cı maddəsinə müvafiq bəndlər əlavə edilib. Orada göstərilir ki, nəqliyyat vasitəsini idarəetmə hüququ bir ildən çox müddətə məhdudlaşdırılmış şəxslərə sürücülük vəsiqəsi nəqliyyat vasitəsini idarəetmə vərdişləri üzrə təcrübi imtahanı müvəffəqiyyətlə verdiyi, nəqliyyat vasitəsini idarəetmə hüququ bir il və ya daha az məhdudlaşdırılan şəxslər isə imtahansız, müddət bitdiyi gün qaytarılmalıdır.

K.Əliyev deyir ki, dəyişikliklərdən öncə, nəqliyyat vasitəsini idarəetmə hüququ məhdudlaşdırılmış şəxslərin sürücülük vəsiqəsi bütün hallarda şəxs tibbi müayinədən keçdiyi və nəqliyyat vasitəsini idarəetmə vərdişləri üzrə təcrübi imtahanı müvəffəqiyyətlə verdiyi gün qaytarılırdı.

Əsasnaməyə edilən dəyişikliklərin zəruriliyinə gəlincə, şöbə rəisi bildirdi ki, bununla bağlı çoxsaylı müraciətlər vardı: "Şikayətlər edirdilər ki, imtahan verib sürücülük vəsiqəsi almışıq, 3-4 ay müddətinə sürücülük hüququ məhdudlaşdırılıbsa, niyə imtahan verməliyik. Bütün bu kimi müraciətlər nəzərə alındı və məsələ həllini tapdı".

K.Əliyev qeyd etdi ki, əgər sürücülük vəsiqəsinin müddəti bitməyibsə, onu geri qaytaran zaman heç bir rüsum ödənilmir. Ancaq sürücülük vəsiqəsinin məhdudlaşdırılması dövründə, sürücülük vəsiqəsinin etibarlılıq müddəti bitibsə, tibbi sağlamlıq haqqında arayış təqdim etməli və sürücülük vəsiqəsinə görə 15 manat dövlət rüsumu ödənilməlidir.

Anar Məmmədov
Milli.Az