Yol polisi istədiyi yerdə dönmə edə bilərmi?

Kamran Əliyev: "Yol polisi, təcili tibbi yardım, yanğından mühafizə xidməti maşınlarının qanunun tələblərindən kənara çıxmaq səlahiyyəti var"

Paytaxt yollarında açıq lyuklar və dərin çuxurlar tez-tez sürücülərin qarşısına çıxır. Bu mövzuda yazan "Bizim Yol" qəzeti qeyd edir ki, yol hərəkətinin təhlükəsizliyi təmin olunmur. Müəllifin qeydlərinə görə, Dövlət Yol Polisi yollardakı təhlükə yaradan məsələlərin aradan qaldırılması üçün təqdimat verməyi "unudur".

Ancaq bu təhlükə mənbələrini aşkarlayıb təcili təhlükəsizlik tədbirləri görmək və müvafiq qurumlardan təhlükə mənbələrinin aradan qaldırılmasını tələb etmək məhz DYP-nin vəzifəsidir. Qəzet xatırladır ki, "Polis haqqında" Qanunun 3-cü maddəsinin 16-cı bəndində (polisin vəzifələri barədə) göstərilir ki, polis yol hərəkəti təhlükəsizliyinin təmin edilməsi üçün tədbirlər görməlidir.

Yol polisinin vəzifə və səlahiyyətləri barəsində ikinci bir sual isə redaksiyamıza oxucular tərəfindən ünvanlanıb.

Sürücülər yazırlar ki, yol patrul xidməti əməkdaşları YPX maşınlarını istədiyi yerdə saxlayır, istədiyi yerdə manevr edir, qoşa, yaxud tək xətt olan yerdə dönmə əməliyyatı edir. Yəni yol polisi özü yol hərəkət qaydalarını pozmuş kimi görünür. Şəhərin müxtəlif ərazilərində bu hallara rast gəlmək olar. Ancaq əslində necə olmalıdır, qanunda nə göstərilib?

Baş Dövlət Yol Polisi İdarəsinin şöbə rəisi Kamran Əliyev "Yeni Müsavat"ın suallarını cavablandırarkən bildirdi ki, açıq lyuklarla bağlı sual Bakı Şəhər Dövlət Yol Polisinə ünvanlanmalıdır. Onun sözlərinə görə, açıq lyuklarla bağlı problemə sözügedən idarə baxır.

K.Əliyev patrul xidməti maşınları barəsində isə bildirdi ki, onların qanunun tələblərindən kənara çıxmaq səlahiyyəti var.

BDYPİ rəsmisi qanunda yol polisi, təcili tibbi yardım, yanğından mühafizə xidməti maşınlarının qaydalardan kənara çıxmaq səlahiyyətinin olduğunu xatırlatdı. Yəni yol polisi maşını sayrışan işıqları qoşmaqla qadağan olunmuş yerdən dönə bilər. K.Əliyev bildirdi ki, yol polisi, təcili yardım, yanğınsöndürən maşınları sayrışan siqnalla gedəndə sürücülər ona yol verməlidir: "Yol hərəkət iştirakçıları yol vermədiyi halda inzibati məsuliyyət daşıyır".

Milli.Az