Lada Niva geri qayıdır: Yeni dizaynı ilə valeh etdi - FOTO

Sovet dövründən bəri istehsalı davam edən əfsanəvi yolsuzluq avtomobilinin tamamilə yenilənmiş dizayn və müasir SUV cizgiləri ilə yenidən yollara qayıtmağa hazırlaşdığı iddia edilir.

Milli.Az xəbər verir ki, Rusiyanın ikonik modeli olan "Lada Niva" sızdırılan yeni patent görüntüləri ilə birlikdə tamamilə yenilənmiş versiyada yenidən gündəmə gəlib. Paylaşılan dizaynlar avtomobilin daha müasir bir SUV kimliyinə bürünə biləcəyini və hətta dizayn dili baxımından "Dacia" modelləri ilə bənzərlik daşıdığını göstərir. Bu bənzərliyin isə təsadüf olmadığı iddia edilir. Görüntülərdə ən çox diqqət çəkən detallar arasında klassik "Niva"ya işarə edən yuvarlaq fara dizaynı və küncli, möhkəm kuzov quruluşu ön plana çıxır. Bundan əlavə, avtomobil daha əzələli qanadlar, yüksəldilmiş çiyin xətti və müasir LED işıqlandırmalarla günümüzün SUV dizayn anlayışına olduqca yaxın, daha çağdaş bir görünüş qazanıb.

Layihənin başlanğıcda "Renault" ilə əməkdaşlıq dövründə hazırlandığı irəli sürülür. Lakin "Renault"un Rusiya bazarından çəkilməsindən sonra işlərin tamamilə yerli mühəndislik imkanları ilə davam etdirildiyi bildirilir.

Yeni modelin "Renault-Dacia"nın CMF-B platforması üzərində inşa edilməsi planlaşdırılarkən, bəzi mənbələr avtomobilin bunun əvəzinə "Lada Vesta" bazasından törədilmiş bir arxitektura ilə gələ biləcəyini deyir. Mühərrik seçimlərində isə "AvtoVAZ"ın mövcud 1.6 və 1.8 litrlik benzinli aqreqatlarının yer alması gözlənilir.

"Lada Niva Legend" 1977-ci ildən bəri demək olar ki, dəyişmədən istehsalda qaldığı halda, "Lada Niva Travel" isə 1998-ci ildən bəri bazardadır və illər ərzində müxtəlif yenilənmələrlə təkmilləşdirilib. Bu seriyaya əlavə olaraq, "Lada"nın yeni SUV həmləsi çərçivəsində bu il ərzində "Lada Azimut" modelinin də təqdim edilməsi gözlənilir.

Lalə Qüdrətova
Milli.Az