Yaxın illərdə Gəncə şəhərində tramvay xətti bərpa olunacaq

Milli.Az Kəpəz TV-yə istinadən xəbər verir ki, ilkin mərhələdə şəhərin 4 istiqaməti üzrə tramvay yolunun çəkilməsi planlaşdırılır.

Gəncəyə çəkiləcək tramvay xətləri tramvay istehsalı və tramvay xəttinin çəkilişi ilə məşğul olan dünyanın aparıcı şirkətlərindən sayılan Fransanın "ALSTOM" şirkətinin nümayəndələri ilə müzakirə edilib. Şirkət üzvləri Gəncədə həyata keçirmək istədikləri layihə və istehsal etdikləri tarmvay vaqonlarının modelləri haqda ictimaiyyət nümayəndələrini məlumatlandırıblar.

Tramvay xətlərinin çəkilişi, müxtəlif tramvay modelləri və marşrut istiqamətlərinin necə təyin edilməsindən bəhs edən qısametrajlı sənədli filim də ictimaiyyətə təqdim edilib. Təqdimatda, həmçinin tramvayların optimal sayı, marşrutların uzunluğu, hərəkət periodikliyi və digər göstəricilər barədə müzakirələr aparılıb. Gəncədə tramvay çəkilişinə nə vaxt başlanılacağı və tramvay modelinin seçimi mart ayında baş tutacaq növbəti görüşdən sonra məlum olacaq.

Gəncə Şəhər İcra Hakimiyyətinin başçısı Elmar Vəliyev: "İlkin təqdimatda öz işlərini təqdim etdilər. Biz marşrutun şəhərin hansı istiqamətlərindən keçəcəyini təqdim edəcəyik və marşruta uyğun layihə hazırlanacaq. Daha sonra digər detallara baxılacaq. Mart ayında bir də gələcəklər və proses üzərində işlər öz həllini tapacaq".

Elmar Vəliyev Gəncə üçün fərqli və müasir bir tramvay modelinin seçiləcəyini bildirib. Tramvay xətləri şəhəri dörd hissəyə böləcək. Layihənin ilkin variantı Gəncənin əhalisi və ərazisi nəzərə alınmaqla hazırlanacaq.

"ALSTOM" şirkətinin vitse prezidenti Flip Romyo: ""ALSTOM" şirkəti ilə Gəncə şəhər rəhbərliyi arasında ilk görüşümüzdür. Biz konkret təkliflər üzərində çalışmaq təklifini aldıq. İki ay müddətinə Gəncəyə qayıdıb bu layihədə olan dialoqumuzu davam etdirəcəyik".

Layihədə tramvay xətləri keçəcək küçə və prospektlərin genişliyi də nəzərə alınacaq. İlkin olaraq marşrutun Heydər Əliyev və Şah İsmail Xətai prospektlərindən də keçəcəyi nəzərdə tutulur. İlk olaraq tramvay xətti 15 kilometr uzunluğunda olacaq. Daha sonra
isə həmin xətt uzadılacaq.

Milli.Az