Cəmiyyət

Kolleclərdə boş qalan yerlərə qəbul elan edildi

23 Sentyabr 2026 10:43

Baxış: 211

VTB-də minimal faiz dərəcəsi ilə nağd kredit 9.9%-dən

Tam (11 illik) orta təhsil bazasında orta ixtisas təhsili müəssisələrinin boş qalan plan yerlərinə qəbul elan edilib.

Milli.Az xəbər verir ki, bu barədə Dövlət İmtahan Mərkəzindən (DİM) məlumat verilib.

Bildirilib ki, boş qalan plan yerlərinə qəbul üçün ixtisas seçimi sentyabrın 23-dən 27-dək aparılacaq.

Müsabiqədə iştirak etmək üçün abituriyentlərin ümumi balı ən azı 50, tədris dili (Azərbaycan dili və ya rus dili) və riyaziyyat fənlərinin hər biri üzrə balı isə ən azı 10 olmalıdır. Xarici dil fənni üzrə bal məhdudiyyəti tətbiq edilmir.

Xüsusi qabiliyyət tələb edən ixtisasların müsabiqəsində iştirak üçün isə ümumi balın ən azı 40 olması və abituriyentin müvafiq komissiya tərəfindən keçirilən qabiliyyət imtahanından "məqbul" alması tələb olunur. Bu ixtisaslar üzrə fənlərə dair bal məhdudiyyəti tətbiq edilmir.

İxtisas seçimi sentyabrın 27-si saat 23:59-dək internet vasitəsilə aparılacaq. Abituriyentlər qəbul olmaq istədikləri ixtisasları seçərək onların kodlarını "Abituriyentin elektron ixtisas seçimi ərizəsi"nə daxil etməli və ərizəni təsdiqləməlidirlər.

Müəllif: Malik Məlikov (Milli.Az redaktor)