Tətildən sonra uşağı məktəb rejiminə necə qaytarmaq olar?

"Uşağın gündüz yuxusuna ehtiyacı yaşından və fərdi xüsusiyyətlərindən asılıdır".

Milli.Az xəbər verir ki, bunu canlı yayımda Səhiyyə Nazirliyi K.Y. Fərəcova adına Elmi-Tədqiqat Pediatriya İnstitutun doktorantı pediatr Regina Nemətova deyib.

Onun sözlərinə görə, adətən 2-2,5 yaşa qədər olan uşaqlara gündüz yuxusu lazımdır. 3 yaşdan böyük uşaqlar gündüz yatmaya da bilərlər. Amma bəzi məqamlara diqqət etmək lazımdır:

"Əgər uşaq gündüz yatmaqdan imtina edir, lakin axşam saat 17:00-18:00 radələrində narahat olur, ağlayır, yorğunluq və yuxululuq müşahidə edilirsə, bu, onun hələ gündüz yuxusuna ehtiyacı olduğunu göstərir. Uşaq 4, 5 və ya 6 yaşındadırsa, gündüz yatmır və axşam saat 21:00-22:00-da rahat şəkildə yuxuya gedirsə, gün ərzində narahatlıq və həddindən artıq yorğunluq yaşamırsa, gündüz yuxusunu məcbur etmək lazım deyil. Amma məsləhətim odur ki, uşaq yatmaq istəməsə belə, gündüz ən azı bir saat sakit şəkildə uzansın və dincəlsin".

Regina Nemətova yay aylarında uşaqların fiziki aktivliyi üçün səhər və axşam saatlarının daha uyğun olduğunu deyib:

"Yay fəslində uşaqların fiziki aktivliyi əsasən səhər saatlarında, saat 10:00-11:00-a qədər və axşam saat 17:00-dan sonra olmalıdır. Bu zaman günəş şüalarının təsiri daha az olur. Uşaq həyətdə, bağda və ya açıq havada fiziki aktivliklə məşğuldursa, başında mütləq papaq olmalıdır. Kölgəlikdə, buludlu havada və ya günəş hələ tam çıxmayanda belə bu qaydaya əməl edilməlidir. Bundan əlavə, uşağın kifayət qədər maye qəbul etməsinə diqqət yetirmək lazımdır. Əsasən təmiz su verilməlidir".

Pediatr valideynlərə uşaqların yuxu və qida rejimini məktəb başlamazdan bir neçə gün əvvəl deyil, ən azı 1-2 həftə əvvəl tənzimləməyə başlamağı tövsiyə edib:

"Uşağın qida və yuxu rejimini sentyabrın 14-də, məktəbin başlamasına bir gün qalmış deyil, ən azı 1-2 həftə əvvəl tənzimləmək lazımdır. Bu, həm valideynlər, həm də uşaqlar üçün daha rahat olacaq".

Bildirib ki, yay aylarında səhər daha gec oyanmaq və axşam daha gec yatmaq mümkündür. Amma sentyabrın əvvəlindən etibarən rejimi tədricən dəyişmək lazımdır:

"Məsələn, uşaq yayda saat 11:00-da oyanırsa, ilk gün 10:30-da, növbəti gün 10:00-da, daha sonra 09:30-da oyatmaq olar. Beləliklə, səhər oyanma vaxtını tədricən daha erkən saata çəkmək mümkündür. Uşağı səhər saat 11:00-da oyadıb axşam saat 21:00-da yatızdırmağa çalışmaq düzgün yanaşma deyil. Çünki uşaq gün ərzində kifayət qədər yorulmadığından erkən yatmaqda çətinlik çəkəcək. Ona görə rejimi səhər oyanma saatından başlayaraq tədricən dəyişmək lazımdır. Bunu 1-2 həftə ərzində qaydaya salmaq mümkündür".

R.Nemətova onu da vurğulayıb ki, həm yayda, həm də məktəb dövründə yatmazdan ən azı 1 saat əvvəl bütün elektron cihazları kənara qoymaq lazımdır:

"Telefon, planşet və digər ekranlardan istifadə edilməməlidir. Bunun əvəzinə kitab oxumaq, vanna və ya duş qəbul etmək kimi sakitləşdirici fəaliyyətlərə üstünlük vermək və daha sonra yuxuya getmək məsləhətdir".

Müəllif: Mina Mikayılova (Milli.Az müxbir)