Ramazanda şəhid ailələri metrodan pulsuz istifadə edə bilər? - RƏSMİ AÇIQLAMA

Sosial şəbəkələrdə şəhid ailə üzvlərinin metrodan ödənişsiz istifadə etməsi ilə bağlı məlumatlar paylaşılıb. Bunun da Ramazan bayramı ilə bağlı olduğu qeyd edilib. 

Milli.Az xəbər verir ki, yayılan iddia ilə bağlı "Bakı Metropoliteni" QSC-dən bildirilib ki, metrodan ödənişsiz istifadə etmək hüququ olan sərnişinlərin əhatə dairəsi və bu hüququn əsasları aşağıdakı qanunvericilik aktları ilə müəyyən edilib:

Nazirlər Kabinetinin 19 oktyabr 2010-cu il tarixli 179 nömrəli qərarı ilə təsdiq edilmiş "Bakı Metropolitenindən İstifadə Qaydaları"nın 4.1.1-ci bəndinə əsasən sərnişinlər 7 yaşınadək uşaqlara görə gedişhaqqı ödəməmək hüququna malikdirlər;

xidməti vəzifələrinin icrası zamanı polis əməkdaşları - "Polis haqqında" qanunun 38-ci maddəsinin IV hissəsinə əsasən xidməti vəzifələrinin icrası zamanı polis əməkdaşları ölkə ərazisində sərnişin nəqliyyatının bütün növlərindən (taksidən və şəhərlərarası nəqliyyatdan başqa) pulsuz istifadə etmək hüququna malikdirlər;

müddətli həqiqi hərbi xidmət hərbi qulluqçuları - "Hərbi qulluqçuların statusu haqqında" 25 dekabr 1991-ci il tarixli 36 nömrəli qanunun 6-cı maddəsinə görə müddətli həqiqi hərbi xidmət hərbi qulluqçuları sərnişin nəqliyyatının bütün növlərindən (taksidən başqa) pulsuz istifadə edirlər.

3 oktyabr 1997-ci il tarixli, 377-IQ nömrəli qanunla təsdiq edilmiş "Hərbi xidmətkeçmə haqqında" Əsanamənin 4-cü bəndinə, "Hərbi vəzifə və hərbi xidmət haqqında" 23 dekabr 2011-ci il tarixli 274-IVQ nömrəli qanunun 28.2-ci maddəsinə görə müddətli həqiqi hərbi xidmət keçən hərbi qulluqçulara qanunla müəyyən edilmiş müddətlər daxilində həqiqi hərbi xidmət keçən əsgərlər, matroslar və çavuşlar aiddirlər.

Qeyd edək ki, mövcud qanunvericilikdə şəhid ailələrinin metrodan pulsuz istifadə etməsi ilə bağlı hər hansı müddəa yer almır.

Aysel
Milli.Az