Tanınmış azərbaycanlı teleaparıcı: "Bir neçə aya vətənə dönə bilərəm" - FOTO

"Xəzər" telekanalında yayımlanan "Xeyir körpüsü", "Vətənimdir Azərbaycan" verilişlərinin aparıcısı Hacı Nuran Hüseynovun səhhətində irəliləyiş hiss olunur. Teleaparıcı bu haqda Milli.Az-a danışıb.

"Bəli, səhhətimdə irəliləyiş hiss olunur, 1 ildə aldığım müalicələr, Allaha şükür olsun ki, öz nəticəsini göstərir. Amma hal-hazırda bu müalicəni bir neçə ay da keçməli və yaxın gələcəkdə, daha doğrusu, 3 il ərzində, ildə 2 dəfə müayinə olunmaqla, müalicəni davam etdirməliyəm. Mən hal-hazırda Almaniyanın Köln şəhərində yerləşən "Medical Center Cologne" klinikasında müalicə alıram, mənim həkimim, həmçinin klinikanın baş direktoru Robert Gorter Nobel mükafatı laureatı, ABŞ Kaliforniya San-Francisko Universitetinin, Almaniyanın Vitta-Herdeka və Sankt-Peterburq Universitetinin professoru, tibb elmləri doktorudur. O deyir ki, bir neçə aya mən vətənə dönə bilərəm.

Səhhətimlə maraqlanan hər kəsdən razıyam, sağ olsunlar, minnətdaram, Azərbaycanın bütün bölgələrindən, ən yaşlısından tutmuş ən kiçiyinə qədər mənə maddi və mənəvi kömək olanlar, mənim üçün dua edənlərdən Allah razı olsun. Qeyd edim ki, gün ərzində sosial şəbəkələr vasitəsilə 300-400 məktub alıram, telefonuma isə ardı-arası kəsilməyən sms-lər və zənglər gəlir. Bütün bunlar mənə xəstəliklə mübarizədə hədsiz güc verərək yardım edir. Əlbəttə ki, çalışdığım və çox darıxdığım doğma "Xəzər" TV-nin rəhbərliyi və kollektivi mənimlə hər gün yaxından maraqlanır və maddi-mənəvi kömək olurlar. Bir neçə ay bundan öncə Xəzər TV əməkdaşları, maliyyə şöbəsinin müdürü Əli İslam, insan resusları şöbəsinin müdiri Vüqar İsayev və yayım şöbəsinin montajçısı Həsrət Yusifov yanıma gəlmişdilər.

Ümumiyyətlə, mən xəstəliyə düşən gündən Milli Onkologiya Mərkəzinin baş direktoru, akademik Cəmil Əliyev, yaxın dostlarım Bəhram Bağırzadə, Avstriyada yaşayan Bəxtiyar Siracov və Tahir Tahirov, Leyla Şeyxzadə, Həsrət Yusifov, Aslan Abdullayev və adlarının burada hallanması istəməyən nə qədər dostlarım, tamaşaçılarım və adi insanlar mənə çox kömək oldular. Onlara da çox-çox minnətdaram. Vətənə dönəndə doğma Bakımı qucaqlamaq istərdim, Vətənim üçün çox, lap çox darıxmışam. Verilişimin birinin adı da məhz "Vətənimdir Azərbaycan" olub", - deyə teleaparıcı bildirib.

Əli Novruzəliyev
Milli.Az