Maykl Ceksonun illərdir gizli saxlanılan səs yazısı yayıldı - Uşaqlar barədə nə deyib? - VİDEO

Maykl Cekson əvvəllər eşidilməmiş səs yazısında uşaqlarla bağlı fikirlərini açıqlayıb

Milli.Az "The Guardian" nəşrinə istinadla xəbər verir ki, mərhum pop ulduzunun sözlərinə görə, uşaqlar onun şəxsiyyətini sevir, ona toxunmaq və qucaqlamaq istəyirdilər və "bəzən bu, onu çətin vəziyyətə salırdı".

Maykl Ceksonun əvvəllər yayımlanmamış səs yazıları yeni sənədli filmdə təqdim olunub. 

Böyük Britaniyanın "Wonderhood Studios" şirkəti tərəfindən hazırlanan və çərşənbə günü yayımlanmağa başlayacaq dörd hissəli sənədli film 2005-ci ildə Los-Anceles yaxınlığında keçirilən və Ceksonun uşaq cinsi istismarı ittihamları üzrə bəraət alması ilə nəticələnən 14 həftəlik məhkəmə prosesini araşdırır.

"The Trial" adlı sənədli filmin tanıtım çarxında Ceksonun sakit səslə dediyi bu sözlər yer alır:

"Uşaqlar sadəcə mənə toxunmaq və qucaqlamaq istəyirlər" .

Sənədli filmdə iştirak edən müsahibələrdən birində səs yazılarında səslənən fikirlərin "indiyədək presedenti olmayan açıqlamalar" olduğu bildirilir. Cekson isə həmin yazılarda "Uşaqlar sadəcə şəxsiyyətimə aşiq olurlar - bəzən bu, məni çətin vəziyyətə salır" deyə qeyd edir.

"New York Post" qəzeti isə şənbə günü Ceksonun səs yazılarında yer alan və geniş rezonans doğuran başqa bir açıqlama barədə məlumat yayıb. Qəzetin iddiasına görə, Cekson səs yazılarında belə deyir:

"Əgər mənə desəydiniz ki, artıq heç vaxt başqa uşaq görə bilməyəcəksən... özümü öldürərdim" .

Xatırladaq ki, Cekson 2003-cü ildə yayımlanan "Living with Michael Jackson" ("Maykl Ceksonla yaşamaq") adlı Britaniya sənədli filmindən sonra yetkinlik yaşına çatmayan uşağa qarşı cinsi istismar, spirtli içki vermə və digər ağır ittihamlarla üzləşmişdi. O, 2005-ci ildə Kaliforniyanın Santa Maria şəhərində keçirilən məhkəmədə bütün ittihamlar üzrə təqsirsiz hesab olunmuşdu.

Fidan
Milli.Az