Xalq artisti 10 min manat maaş alacaq? - “Siyahıda adımı gördüm, sevindim”

"Kinostudiya tarixdir, böyük gəlir yeridir. Azərbaycan Respublikası Kino Agentliyi (ARKA) istehsal ediləcək film layihələrinin bədii və texniki qiymətləndirilməsi ilə bağlı Bədii Şura üzvlərinin arasında mənim də adım var. Siyahıda adımı gördüm, sevindim".

Milli.Az xəbər verir ki, bunu qaynarinfo-ya açıqlamasında Xalq artsiti Şeyx Əbdül Mahmudbəyov Kino Agentliyinin tabeliyində yaranan Bədii Şuranın məqsəd və məramını izah edərkən deyib.

Xalq artisti bildirib ki, həftədə iki dəfə tədbir keçirəcəkər:

"Mən bununla bağlı dəfələrlə məsələ qaldırmışdım ki, Azərbaycanın milli kino məbədgahı deyilən bir məkan var - Azərbaycan Film Kinostudiyası, onun fəaliyyətini bərpa etmək lazımdır. Ayıbdır, adam belə sənət ocağını bərbad günə qoymaz, ora bərpa olunmalıdır. Onun bərpası üçün mən illərlədir variantlar təqdim edirəm".

Şeyx Əbül Mahmudbəyovun sözlərinə görə, kino yaradıcılığı ilə bağlı istehsal olunan bütün filmlər ARKA-da müzakirə olunmalıdır:

"Azərbaycanda kino ilə bağlı nə varsa, hamısı kinostudiyada fəaliyyət göstərməlidir ki, ocağımız yansın, tüstümüz çıxsın. Söhbət peşəkar səviyyədən çəkilən filmlərdən gedir".

Xalq artisti teleserialların ARKA-ın nəzarətində olmadığını vurğulayıb:

"İstəyirik ki, teleseriallar bizə baxmasınlar. Azərbaycanda 20-dən yuxarı kino şirkəti var. Gəlsinlər, müraciət etsinlər ki, biz də onlara kinostudiyada yer verək, orada fəaliyyət göstərsinlər. Kinostudiyada olsunlar ki, bəlkə səviyyələri də yüksələ".

Aktyor şurada fəaliyyətinə görə, nəzərdə tutulan 10 min manat maaşına da aydınlıq gətirib:

"Bu, bir ay üçün nəzərdə tutulmayıb. Biz şuraya vaxt sərf edirik, müzakirlərdə iştirak edirik. Buna görə dövlət bizə məvacib verir. 12 ayın maaşıdır".

Xatırladaq ki, Mədəniyyət Nazirliyinin tabeliyində fəaliyyət göstərən Azərbaycan Respublikası Kino Agentliyi (ARKA) istehsal ediləcək film layihələri bədii və texniki qiymətləndiriləcək. Bunun üçün ARKA-ın nəzdində Bədii Şura yaradılıb. ARKA qeyd olunan şəxslərin hər birinə 9 800 manat ödəniş edəcək.

Milli.Az