Azər Aydəmir kimdir? - Prokuror, qumarbaz, malakan

Lent.az "Bioqrafiya" rubrikasında aktyor, ssenarist, prodüser Azər Aydəmir barədə məlumat verir.

- Azər Aydəmir harada və nə zaman anadan olub?

Azər Aydəmir 24 iyul 1986-cı ildə Bakı şəhərində anadan olub.

-    Azər Aydəmir milliyyətcə azərbaycanlıdır?

Aktyorun əsli Xızıdandır. Atası malakandır. Yüz il bundan qabaq Altıağaca köçən malakan sülaləsindəndir. Ata nənəsi rus, anası isə dağlıdır, Əmbizlər kəndindən.

-    Azər Aydəmir  aktyorluq təhsili alıb?

Yox. O İqtisad Universitetinə daxil olsa da, təhsilini başa vurmayıb, birinci kursdan yarımçıq qoyub.

-    Azər Aydəmir aktyorluğa qədər hansı işlərdə çalışıb?

Azəravtoyol QSC-nin nəznində olan, "Azərbaycan Yolları", "Zirvə Yolu", "Revanş" qəzetlərində müxbir, neft jurnalı olan "Caspian Energy" də, müxbir və reklam meneceri,  bir sıra avtomobil şirkətlərində PR və Marketing meneceri vəzifəsində çalışıb. 2008-ci ildə Zirvə Motors (İsuzu) Şirkətinin direktoru işləyib. 2005-ci ildən 2014-cü ilə kimi paralel olaraq restoran və hotelçilik fəaliyyəti ilə məşğul olub. Bakının tanınmış karaoke klublarının (Z CLUB) əsasını qoyub, tədbirlərin təşkilatçısı kimi fəaliyyət göstərib.

- Azər Aydəmir tək böyüyüb?

O, bu suala belə cavab verib: "Mən erkən, 8 yaşımda atamı itirmişdim. Və anam məni gec dünyaya gətirib, haradasa 45 yaşında. Ailəmizin yeganə gəlir yeri anamın işiydi. Onda mən mütləq şəkildə bir neçə işdə işləmək məcburiyyətində qaldım. 19 yaşımda artıq hər iki valideynimi itirmişdim, ali təhsilim yarımçıq qaldı, tək yaşamağa başladım. Dostlarımın əhatəsində böyüdüm. Hətta elçiliyimə də dostlarımın ailəsi ilə getmişəm. Qohumlarla əlaqəm kəsilib. İllər sonra mənə utanaraq yaxınlaşırdılar. Özlərini sanki günahkar hesab edirdilər. Bunu hiss edirəm. Zərrə qədər kimsədə günah görmürəm, mən özüm tək qalmaq istədim. Özüm dedim ki, tək qalacağam, həyata atıldım. Başa düşüm ki, bu nədir! Ona görə bir nəfərlə də əlaqə saxlamadım ki, onlar məni unutsunlar, mən də onları!"

- Azər Aydəmir ailəlidir?

Bəli. Bir övladı var.

- Xanımı qadınlar tərəfindən çox bəyənilən Azər Aydəmiri qısqanır?

O, bu suala bir müsahibəsində belə cavab verib: "Hər qadın ərinin şöhrət qazanmasına dözə bilmir. Bunun dərin psixoloji tərəfləri var. Xanımım mənim uğurlarıma sevinir və pərəstişkarların olması onu incitmir. Xanımım o barədə əjdahadır, şir ürəyi yemiş qadındır. O bilir mən kiməm, mən bilirəm o kimdir. Çətin günləri birlikdə aşmışıq. Bu uğuru 22 yaşımda qazansaydım, yəqin fərqli reaksiyam olardı, evdə tapılmazdım. Amma indi nə etdiyimi bilirəm. Nə baş verdiyinin də, həyat yoldaşımın məndən gözləntilərinin də fərqindəyəm. Ona görə evə də zamana ayırmağı bilirəm, övladıma da. İndi evə daha çox diqqət ayırıram".

- Azər Aydəmir oynadığı rollarda gah prokuror, gah qorxaq, yaltaq bərbər, gah səbirli, tükənmiş alman, gah söyüşkən otel adamı, gah vəhşi qumarbaz. Obrazlarından hansı ona daha çox bənzəyir?

- Aktyorun  bu suala cavabı belə olub: "Heç biri. İndi qarşınızda gördüyünüz adam mənəm. Korporativ, səhər doqquzdan axşam altıyacan ofisdə işini görən bir tipəm. Yaradıcı insanam, amma heç istəmirəm ki, məni yalnız yaradıcı insan kimi tanısınlar. Mən də evimin kişisiyəm, mən də təmir etdirmişəm. Həll etdiyim yüzlərlə problem var. Mənimlə kişi kimi söhbət elə də. Yaradıcı adam nə deməkdir? Ona görə, yaradıcı adam tipajında olmaq istəmirəm. Ay sırğa taxım, saçımı uzadım, istəmirəm küçədə baxıb desinlər ki, hə bu yaradıcı adamdır. Görünüşümüzdən çox şey tökülür, haqqımızda danışır".

- Azər Aydəmir rollarında söyüşlərdən, jarqon ifadələrdən çox istifadə edir. Real həyatda söyüşkəndir? 

"Söyüş söyən adam deyiləm, amma olur da. Səbirli insanam, di gəl partlayanda özümü saxlaya bilmirəm. Çox maraqlıdır ki, birinə hirslənmişəmsə, ilk bir dəqiqəni ona bağırıram, sonra il ərzində nə qədər məni əsəbiləşdirən adam olubsa, onları da qatıram işin içinə, tökürəm onun üstünə",- deyə o bildirib.

- Azər Aydəmir kaprizli və bahalı aktyordur?

O bu suala "Çox kaprizli deyiləm. Bahalılığa qalınca, prodüserlik bilgilərim olduğuna görə, mövcud bazarı yaxşı bilirəm. Mənim qonorarım bazardakı standart qiymət, standart qonorarlardan üstündür. Amma məndən də baha qonorar alanlar var" cavabını verib.

- Azər Aydəmirin əlavə biznesi var?

Yoxdur, amma 5-6 sahəylə birdən məşğuldur. "ArtBakers" reklam şirkətinin baş direktoru,  İTV- nin aparıcılarından biri, "Azərsell"in səsi, reklam bazarında fəaliyyəti var, bəzi şirkətlərin tanıtımı ilə məşğuldur.

- Azər Aydəmir toylara tamada kimi  dəvət alır?

O bu günə qədər dəvətlərə "yox" desə də bundan sonra elit toylarda aparıcı kimi iştirak edəcəyini bildirib.

Milli.Az
​Xəbərlərimizi WhatsApp kanalımızdan da oxuyun