Dünya

Feridun Sinirlioğlu BMT Baş katibi vəzifəsinə namizəd oldu

31 Oktyabr 2026 10:50

Baxış: 356

VTB-də minimal faiz dərəcəsi ilə nağd kredit 9.9%-dən

#TÜRKİYƏ #BMT

Türkiyə hazırda Avropada Təhlükəsizlik və Əməkdaşlıq Təşkilatının (ATƏT) Baş katibi vəzifəsini icra edən, sabiq xarici işlər naziri və diplomat Feridun Sinirlioğlunun Birləşmiş Millətlər Təşkilatının (BMT) Baş katibi vəzifəsinə namizədliyini rəsmi olaraq təqdim edib.

Milli.Az qafqazinfo-ya istinadən xəbər verir ki, Türkiyənin BMT-dəki daimi nümayəndəsi, səfir Ahmet Yıldız "Anadolu" agentliyinə bildiriş məktubunun artıq BMT Baş Assambleyasının Sədrliyinə təqdim edildiyini açıqlayıb.

"Prezidentimiz Rəcəb Tayyip Ərdoğan səfir Sinirlioğlunun lazımi keyfiyyətlərini, təcrübəsini və ona olan etimadı nəzərə alaraq, onu BMT-nin Baş katibi vəzifəsinə namizəd göstərməyi məqsədəuyğun hesab edib", - o deyib.

Ahmet Yıldız bildirib ki, BMT-nin Baş katibi seçkilərində hələlik konsensus əldə olunmuş vahid namizəd ortaya çıxmadığı üçün Türkiyə bu prosesi asanlaşdırmaq məqsədilə öz namizədini irəli sürüb. O, həmçinin bu post üçün Latın Amerikası və Karib dənizi regionundan olan diplomatların irəli sürülməsi ənənəsinə hörmətlə yanaşdıqlarını və bu səbəbdən indiyədək gözlədiklərini vurğulayıb.

Qeyd edək ki, Feridun Sinirlioğlu 2015-ci ildə Türkiyənin xarici işlər naziri, 2016-2023-cü illərdə isə ölkənin BMT-dəki daimi nümayəndəsi vəzifələrində çalışıb. O, hazırda ATƏT-in Baş katibi kimi beynəlxalq diplomatik missiyasını davam etdirir.

Müəllif: Tural Hüseyn (Milli.Az redaktor)