Azərbaycan, Türkiyə və Pakistan gücünü birləşdirdi - ÖZƏL AÇIQLAMA

"Azərbaycanın 44 günlük müharibəsindən sonra ortaya yeni bir reallıq çıxıb. Bu reallıq, bölgədə önəmli əməkdaşlığa yol açıb".

Bunu Milli.Az-a açıqlmasında Türkiyənin Azərbaycandakı sabiq səfiri Hulusi Kılıç deyib.

Keçmiş səfir bildirib ki, 44 günlük müharibə Türkiyə, Pakistan və Azərbaycanı bir-birinə daha da yaxınlaşdırdı:

"Bilirik ki, Vətən müharibəsi zamanı həm Türkiyə, həm Pakistan Azərbaycana lazım olam siyasi və diplomatik dəstəyi verdi. Bu dəstək müharibənin bitməsindən sonra da açıq şəkildə bu 3 ölkəni bir-birinə daha sıx yaxınlaşdırdı. Türkiyə ilə Azərbaycan onsuz da bir millət, iki dövlət anlayışı ilə əməkdaşlığını davam etdirirdi, amma bu münasibətlərə yeni bir oyunçu, yeni bir dövlət daxil olub - Pakistan. Pakistan bizim əsirlərə söykənən qardaş və dost bir ölkədir. İllərdir həm Türkiyəyə, həm də Azərbaycana dəstək nümayiş etdirib. 

İki gün əvvəl imzalanan Bakı Bəyannaməsi tarixi bir sənəddir, tarixdə xüsusi yer tutacaq. Çünki bu sənədin tarixi olması, öncə üç ölkənin xalqlarının bir həmrəyliyidir. Bildiyiniz kimi parlamentlər xalqı təmsil edərlər. Xalqın seçdiyi nümayəndələr parlamentdə yer alarlar. İndi bu nöqteyi nəzərdən Bakı Bəyannaməsi xalqlar arasındakı qardaşlıq bağlarını göstərən bir sənəddir. Tarix ilk dəfə üç dövlət bir araya gəlir və belə bir sənədə imza atır.

44 günlük Vətən müharibəsindən sonra da üç ölkənin XİN rəhbərləri də İslamabadda görüşmüşdülər. O vaxt da Azərbaycan Milli Məclisinin sədri də (spiker) Pakistana rəsmi səfər etmişdi. Bunu təhlükəsizliyə qarşı Qafqazlarda yeni bir güc olaraq dəyərləndirmək lazımdır. Yəni, bu 3 ölkənin həmrəyliyindən əlavə əməkdaşlığına da şahidik. Bu Bəyannamədə sülhün, sabitliyin qorunması məsələsi prearitet təşkil edir. Bu sənəd qonşu ölkələrə qarşı olmadığı kimi, qonşu ölkələrlə əməkdaşlığın yolunu açmağa xidmət edir. Arzu edən qonşu ölkələrlə, bizimlə eyni şəkildə əməkdaşlıq etmək istəyənlərlə əməkdaşlığa hazırıq. 

Bakı Bəyannaməsində çoxlu mesajlar var, müxtəlif sahələri əhatə edir. Hər üç ölkənin xalqının da bu Bəyannamədən razı qaldığını bilirik və gücümüzü birləşdiririk. "Gücümüz birliyimizdə, birliyimiz gücümüzdədir" sloqanını burada görmək mümkündür".

Təhməz Əsədov
Milli.Az