Siyasət

Qarabağ mövzusu da müxalifəti birləşdirə bilmir

12 Aprel 2010 15:32
Baxış: 196
Demokratiya Uğrunda İttifaqın (DUİ) Sədrlər Şurası aprelin 21-də Qarabağ forumunun keçirilməsi barədə qərar qəbul edib.

DUİ-dən Milli.Az xəbər portalına daxil olan məlumata görə, tədbir Klassik Xalq Cəbhəsi Partiyasının (KXCP) mənzil-qərargahında keçiriləcək.

KXCP sədri Mirmahmud Mirəlioğlu Milli.Az xəbər portalına açıqlamasında bildirib ki, forumda Dağlıq Qarabağ münaqişəsinin nizamlanması ilə bağlı son vəziyyət, yenilənmiş Madrid prinsipləri və rəsmi Bakının bu məsələdə tutduğu mövqe müzakirə olunacaq. O, etiraf edib ki, tədbirdə müxalifət düşərgəsini təmsil edən bütün partiyaların iştirakı gözlənilmir. O, bunu ironik şəkildə izah edir: "Müxalifətin spektri genişdir. Hər kəsin durduğu coğrafi yer var. Müxalifət partiyalarının mövqeləri, istək və arzuları bir-birindən fərqləndiyi üçün onların hamısının Qarabağ forumlarında iştirakını təmin etmək mümkün olmur". KXCP sədri istisna etmir ki, müxalifət partiyalarının ümummilli məsələlər, o cümlədən, Dağlıq Qarabağ münaqişəsi ilə bağlı mövqeləri üst-üstə düşmür.

Mirmahmud Mirəlioğlunun fikrincə, Qarabağ forumlarının keçirilməsi Ermənistan-Azərbaycan münaqişəsinin cəmiyyətdə aktuallığının qorunması, müqavimət hissinin nümayiş etdirilməsi baxımından əhəmiyyətlidir. Onun sözlərinə görə, indiyədək keçirilən tədbirlərdə bir sıra müraciətlər qəbul olunub və ölkə hökuməti belə müraciətlərə etinasız qalmayıb.

Ceyhun
Milli.Az

 

Azernews Newspaper

XƏBƏR LENTİ

Copyright © 2026 Milli.Az

Saytdakı materialların istifadəsi zamanı istinad edilməsi vacibdir. Məlumat
internet səhifələrində istifadə edildikdə hiperlink vasitəsi ilə istinad mütləqdir.