Paşinyan "qırmızı xətti" keçdi - Ona "aprel dərsi" verməyin vaxtı gəlib çatıb

"Ermənistanın Baş naziri Nikol Paşinyan uzun müddət Dağlıq Qarabağ mövzusunda danışmaqdan çəkinib. Həm Ermənistan, həm dünya onun bu məsələdə hazırlıqsız olduğu və hər hansı bir həll variantının olmadığını bilir və görürdü. İndi isə Paşinyanın Ermənistanın sabiq dövlət başçıları Robert Koçaryan və Serj Sarqsyandan da sərt danışmasının bir məqsədi var. Ermənistanı qarşıda növbədənkənar parlament seçkiləri gözləyir. Paşinyan bilir ki, onun mövcud elektoratı parlamentdə əsas səs çoxluğu almaq üçün azlıq edir. Bu baxımdan indi o, radikal erməni siyasətçilərini öz tərəfinə çəkməyə çalışır. Amma onun bu addımı çox uğursuzdur".

Bu barədə Milli.Az-a açıqlamasında Milli Məclisin Müdafiə, təhlükəsizlik və korrupsiya ilə mübarizə komitəsi sədrinin müavini, YAP İcra Katibliyinin Siyasi təhlil və proqnozlaşdırma şöbəsinin müdiri Aydın Mirzəzadə bildirib.

Onun sözlərinə görə, Ermənistan hökumətinin yeni başçısının məsuliyyətsiz bəyanatları Azərbaycanı ən radikal addımları atmağa məcbur edir: "Paşinyan bundan başqa sosial siyasətdə bir sıra uğursuzluqlarla üzləşib. Cəmiyyətə verdiyi vədlərə baxmayaraq, hələ də ortada fəaliyyətinin müsbət bir nəticəsi yoxdur. Rusiya ilə münasibətlərin kəskinləşməsi isə Rusiyanın əlini Ermənistanın üzərindən çəkməsinə gətirib çıxara bilər. Bu baxımdan Paşinyan bu gün böyük bir vurnuxmadadır. O, bir-birinə zidd bəyanatlar verir və əslində Ermənistanın vəziyyətini daha da pisləşdirir. Paşinyanın Moskvada diaspor təşkilatlarının nümayəndələri ilə görüşünün məqsədi də onların iqtisadi və siyasi dəstəyinə nail olmaqdan ibarətdir. Lakin iş burasındadır ki, Rusiya erməniləri Rusiya hakimiyyətinə sıx bağlıdırlar və heç bir halda antirusiya siyasəti yeridən paşinyana dəstək verməyəcəklər. Həmçinin, onun qımızı xətti keçməsi və işğal etdiyi Azərbaycan ərazilərini Ermənistanın bir hissəsi elan etməsi Ermənistanın beynəlxalq aləmdə də çox pis vəziyyətdə qoyur və Azərbaycanı ən radikal addımları atmağa məcbur edir.

Təbii ki, Paşinyanın bu bəyanatı Azərbaycan tərəfindən cavabsız qalmayacaq. Birincisi, Azərbaycan itirilmiş ərazilərini qaytarmaq hüququna malikdir, ikincisi, bütün göstəricilərinə görə Ermənistandan üstündür. Ermənistanın yeni rəhbərinin məsuliyyətsiz bəyanatları Ermənistanın vəziyyətini daha da pisləşdirəcək. Dağlıq Qarabağ məsələsində əvvəlki rəhbərlər uğursuzluğa düçar olduğu kimi, Paşinyanı da böyük uğursuzluq gözləyir".

Paşinyan Moskvada sərsəm bəyanat verdi: Qarabağ Ermənistanın tərkib hissəsidir...

Millət vəkili sosial şəbəkədə paylaşdığı "Aprel gecdir, Paşinyana bir sentyabr hədiyyəsi edək. Qoy ayılsın" fikrini isə belə əsaslandırıb: "İş burasındadır ki, Paşinyan hərbi xidmətdə olmayıb və hərbi sahəni bilmir. Onun yarımhərbi geyimdə gəzməsi isə aktyorluqdan başqa bir şey deyil. O, siyasətdə aktyorluq etməyə çalışır. Paşinyanın oğlunu işğal olunmuş Azərbaycan ərazilərinə göndərməsi, vaxtaşırı Azərbaycana icazəsiz gəlmələrinin özü də bir daha Paşinyanın hazırlıqsız, məsuliyyətsiz və atdığı addımların nə ilə nəticələcəyini qiymət vermək iqtidarında olmadığını göstərir. Onun Azərbaycan ərazilərini Ermənistan ərazisi hesab etməsi isə göstərir ki, Paşinyana artıq bir "aprel dərsi" verməyin vaxtı gəlib çatıb. Bu baxımdan hesab edirəm ki, Azərbaycan Paşinyanın Dağlıq Qarabağla əlaqədar verdiyi bəyanatın nə qədər təhlükəli olduğunun fərqinə varmalıdır. Çünki Paşinyan Dağlıq Qarabağ məsələsində hətta azərbaycanlıların qatili olan Koçaryan və Sarqsyanın da keçməyə ehtiyat etdiyi "qırmızı xətti" keçdi..."

Qeyd edək ki, Ermənistanın Baş naziri Nikol Paşinyan sentyabrın 7-də Rusiyaya səfəri zamanı "Dağlıq Qarabağ respublikası gələcəkdə erməni ərazilərinin tamhüquqlu tərkib hissəsi olmalıdır" və "Mənim təsəvvürümdə Dağlıq Qarabağ Ermənistanın tərkib hissəsidir" kimi bəyanatlar verib, Moskvaya yola düşməzdən əvvəl isə Ermənistanın və bütün erməni xalqının Azərbaycana əks-zərbə vurmağa hazır olduğunu və bu məsələdə heç bir güzəştə gedilməyəcəyini bildirib.

İlkin İzzət
Milli.Az