ALP-nin "böhran masası" təklifi: bəyənən və rədd edənlər kimlərdir?

"Müxalifətdəki proseslərin nüvəsində KXCP, AXCP, ADP, VİP, ALP, AMİP, Ümid və Müsavat partiyalarını görürük. Bu 8 partiyanın çevrəsindən kənarda olan partiyaların da bir araya gətirilməsi məsələsini gündəmə çıxarmışıq. Müxalifətin Müşahidə Mərkəzinin və ya Böhran Masasının yaradılması təklifi də bu məqsədlə Lalə Şövkət tərəfindən irəli sürülüb".

Bu açıqlamanı APA-ya Azərbaycan Liberal Partiyasının (ALP) sədri Əvəz Temirxan deyib. O bildirib ki, bir müddət öncə ADP sədri Sərdar Cəlaloğlu ilə Lalə Şövkətin görüşü keçirilib: "Burada həmin təklif müzakirə olundu, həmçinin Sərdar Cəlaloğlu tərəfindən müxtəlif variantlar irəli sürüldü. Lalə Şövkət bildirdi ki, "Səkkizlər"in dəyirmi masa arxasında bir araya gəlməsinin tərəfdarıdır. İndi top meydanın İctimai Palatada təmsil olunan partiyalara aid hissəsindədir. Əgər onlar buna razılıq verərlərsə, müxalifətin birliyi istiqamətində növbəti addım atılar. Əgər razılıq verməsələr, Vətəndaş və İnkişaf Partiyası ilə birgə müxalifətin birliyi istiqamətində öz fəaliyyətimizi davam etdirəcəyik".

Ə. Temirxan qeyd edib ki, bəzi qəzetlərdə bu təklifdən sonra onlara qarşı qara kampaniya başlayıb: "Bizi iqtidarla əməkdaşlıqda günahlandırılar. Lakin ittiham edən şəxsin özü neçə illərdir iqtidarın müxalifətdəki rezidenti rolunu oynayır və münasibətləri qarışdırmaqla məşğuldur. Biz bunun fərqindəyik və lazımı cavab verəcəyik".

ALP sədri Ə.Temirxan Milli.Az xəbər portalına verdiyi açıqlamasında isə bildirdi ki, "səkkizlər"in bir araya gəlməsi ilə bağlı təklifə Klassik Xalq Cəbhəsi, Ümid, Demokrat partiyaları artıq razılıqlarını bildiriblər.

"Milli İstiqlal Partiyası İctimai Palatadan kənarda fəaliyyət göstərməsə də, prinsip etibarilə təkliflə razılaşıb. Azərbaycan Xalq Cəbhəsi və Müsavat partiyalarından isə təklifimizə nə hə, nə də yox cavabı almışıq. Onların mövqeyini şərh etmək istəməzdik. Sadəcə, hesab edirik ki, hədəflər eyni olsa da, həmin hədəflərə gedən yollara fərqli baxışlar mövcuddur və bu yolları uyğunlaşdırmaq gərəkdir. Siyasi təşkilatların yollarının bir-biri təkrarlaması, eyni zamanda, bir-birlərinə zidd olmamaları üçün zəruri məsləhətləşmələr aparılmalıdır. Fəqət, AXCP və Müsavat istəmirsə, bu, onlarnın öz seçimidir", - Ə. Temirxan dedi.

Orxan
Milli.Az