Politoloq: "Artıq Madrid prinsipləri gündəmdən çıxacaq..."

"Moskvada keçirilən Azərbaycan, Ermənistan və Rusiya Xarici İşlər Nazirlərinin görüşünü Dağlıq Qarabağ münaqişəsinə dair danışıqları durğunluqudan çıxarmaq, bu prosesə yeni bir impulsun verilməsinə cəhd kimi qiymətləndirmək olar".

Bu fikirləri Milli.Az xəbər portalına Moskva görüşünu şərh edən politoloq Rasim Ağayev deyib.

Onun fikrincə,  hələki bu görüşdə heç bir yeni təşəbbüs haqda söhbət aparılmayıb. "Belə bir nəticəyə gəlmək olar ki, Madrid prinsipləri artıq gündəmdən çıxacaq. Çünki bu prinsipləri erməni tərəf tamamilə, Azərbaycan isə qismən qəbul etmir", politoloq bildirib.
Ağayev qeyd edir ki, bu halda gərək Azərbaycan Ermənistana təzyiqlərini davam etdirsin.

"Madrid prinsiplərinə əsaslanan Praqa prosesinin davam etmə prespektivləri yoxdur. Bu onunla bağlıdır ki, Madrid prinsiplərindən söz gedərkən ermənilər Dağlıq Qarabağda referendumun keçirilməsinin tarixini müəyyənləşdirməyi tələb edirlər. Təbii ki, Azərbaycan buna gedə bilməz. Ona görədə indi danışıqlar prosesi başlandığı nöqtəyə qayıdır. Yəni,  Azərbaycanın ərazi bütövlüyü bərpa olunmalıdır, Dağlıq Qarabağ ermənilərinin öz müqəddaratını təyin etməsindən söz belə gedə bilməz".  

Politoloq əlavə edir ki, eyni zamanda Qərb dövlətləri Ermənistanı kompromisə getməyə sövq etməlidirlər. Onları da buna məcbur etmək lazımdır: "Sual oluna bilər ki, Rusiyanın danışıqları təşkil etməkdə marağı nədədir? - Bir tərəfdən Rusiya göstərmək istəyir ki, o, daim sülhməramlı təşəbbüslə çıxış edir, digər tərəfdən isə belə bir fikir yaratmağa çalışır ki, Qarabağ münaqişəsinin həllinin "açarı" Moskvadadır. Halbuki, artıq çoxdandır ki, Moskvanın bu konflikti həll etməsi üçün imkanları tükənib. Ermənistanın əhalisi inkişaf yolunu, yüksək həyat səviyyəsini, tərəqqini Rusiyada deyil, Qərbdə görür. Təsadüfü deyil ki, Ermənistandan qaçan adamlar məhz Avropa və ABŞ-a üz tuturlar. Problem Sarkisyan, Koçaryan hakimiyyəti və ondan geri qalmayan Ter-Petresyan kimi siyasətçilərdədir. Bu adamlar siyasi arenadan getməlidir, Ermənistan hakimiyyətinə muasir dünyagörüşlü, yeni nəsil siyasətçilərin gəlməsi ilə Ermənistan-Azərbaycan münaqişəsi ədalətli həllini tapa bilər".      

Ceyhun
Milli.Az